ກອງທັບລາຊະອານາຈັກກຳປູເຈຍ ຈະຊ້ອມຮົບດ້ວຍລູກປືນແທ້ຢ່າງຂະໜາດໃຫຍ່ຢູ່ແຂວງກຳປົດ ໃນເດືອນພະຈິກປີນີ້.
ທັງນີ້, ແຫຼ່ງຂ່າວຈາກທາງການກຳປູເຈຍ ໄດ້ໃຫ້ຮູ້ໃນວັນທີ 4 ກັນຍານີ້ວ່າ: ການຊ້ອມຮົບດ້ວຍລູກປືນແທ້ທີ່ມີຂະໜາດໃຫຍ່ເທື່ອນີ້ ກໍເພື່ອຍົກຂີດຄວາມສາມາດການສູ້ຮົບຂອງກອງທັບຕົນໃຫ້ສູງຂຶ້ນ ແລະເສີມສ້າງກຳລັງປ້ອງກັນປະເທດໃຫ້ເຂັ້ມແຂງ. ສື່ມວນຊົນທ້ອງຖິ່ນລາຍງານວ່າ: ນາຍແລະພົນທະຫານທີ່ຈະເຂົ້າຮ່ວມຊ້ອມຮົບດັ່ງກ່າວມີປະມານ 1.000 ຄົນ, ຂະນະທີ່ອາວຸດລວມທັງອາວຸດໜັກປະເພດຕ່າງໆ ເປັນຕົ້ນ ປືນໃຫຍ່ B40, ປືນໃຫຍ່ B41 ແລະ ລົດຕັງ ກໍຈະນຳໃຊ້ເຂົ້າໃນການຊ້ອມຮົບເຊັ່ນດຽວກັນ.
ກ່ອນໜ້ານີ້ ຄື ເມື່ອເດືອນມີນາປີ 2010, ເດືອນເມສາ ແລະເດືອນທັນວາ ປີ 2013, ກອງທັບກຳປູເຈຍ ກໍໄດ້ຊ້ອມຮົບດ້ວຍລູກປືນແທ້ມາແລ້ວ ລວມທັງການຊ້ອມຍິງຈະຫຼວດ BM21 ອີກສາມເທື່ອ.
ຂະນະທີ່ເຈົ້າໜ້າທີ່ຂັ້ນສູງຂອງກອງທັບກຳປູເຈຍ ໄດ້ຢືນຢັນວ່າ: ການຊ້ອມຮົບດ້ວຍລູກປືນແທ້ ພ້ອມດ້ວຍການທົດລອງອາວຸດຮຸ່ນໃໝ່ນັ້ນ ບໍ່ໄດ້ແນໃສ່ປະເທດອື່ນໃດ.