ກອງປະຊຸມສຸດຍອດການຄ້າແລະການລົງທຶນຈີນ-ອາຊຽນຄັ້ງທີ 14 ຈະຈັດຂຶ້ນແຕ່ວັນທີ 12-14 ກັນຍານີ້ຢູ່ເມືອງໜານໜິງ ສປ ຈີນ ໂດຍເນັ້ນຫົວຂໍ້ "ຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21, ການທ່ອງທ່ຽວຊຸກຍູ້ການເຊື່ອມໂຍງເສດຖະກິດພາກພື້ນ" ແລະ ຈະມີ 8 ກິດຈະກຳສຳຄັນ ເປັນຕົ້ນ ກອງປະຊຸມໂຕະມົນລະຫວ່າງຜູ້ນຳປະເທດບຣູໄນແລະຜູ້ບໍລິຫານທຸລະກິດສູງສຸດຂອງວິສາຫະກິດຈີນ, ການສຳມະນາການຮ່ວມມືດ້ານກົດໝາຍທຸລະກິດການຄ້າຈີນ-ອາຊຽນ, ເວທີປຶກສາຫາລືຜູ້ນຳວົງການທຸລະກິດຈີນ-ອາຊຽນ, ກອງປະຊຸມແລກປ່ຽນກິດຈະການການຄ້າເອເລັກໂຕຣນິກຂ້າມຊາດຈີນ-ອາຊຽນ ແລະ ການສຳມະນາການຄ້າການລົງທຶນເຂດພັດທະນາພາກຕາເວັນອອກອາຊຽນ.
ທ່ານຕິ່ງຢວນລົງ ຮອງຫົວໜ້າສຳນັກເລຂາກອງປະຊຸມສຸດຍອດການຄ້າແລະການລົງທຶນຈີນ-ອາຊຽນ ຢືນຢັນວ່າ: ບົນພື້ນຖານການມີເວທີການຮ່ວມມືເສດຖະກິດການຄ້າ ແລ້ວນັ້ນ, ກອງປະຊຸມສຸດຍອດການຄ້າແລະການລົງທຶນຈີນ-ອາຊຽນພວມຕັ້ງໜ້າສ້າງກົນໄກການຮ່ວມມືສາກົນຫຼາຍຝ່າຍ ເພື່ອສ້າງຊ່ອງທາງສື່ສານແລກປ່ຽນຫຼາຍເຄົ້າໃຫ້ແກ່ພາກພື້ນຈີນ-ອາຊຽນ ພ້ອມດ້ວຍປະເທດແລະເຂດແຄວ້ນນອກພາກພື້ນ. ຂະນະທີ່ເວທີການຄ້າເອເລັກໂຕຣນິກຂ້າມຊາດຈີນ-ອາຊຽນ ກໍໄດ້ກາຍເປັນໜຶ່ງໃນກົນໄກຮ່ວມມືໃໝ່ຂອງຫຼາຍຝ່າຍລະຫວ່າງຈີນ-ອາຊຽນແລ້ວ.
