ທ່ານ ອີໂກ ຊູວາລົຟ ຮອງນາຍົກລັດຖະມົນຕີຜູ້ທີໜຶ່ງຂອງຣັດເຊຍ ໃຫ້ສຳພາດໃນໂອກາດເຂົ້າຮ່ວມເວທີປຶກສາຫາລືເສດຖະກິດຕາເວັນອອກຣັດເຊຍຄັ້ງທີ 3 ໃນວັນທີ 6 ກັນຍານີ້ວ່າ, ປັດຈຸບັນ, ກົນໄກການຮ່ວມມືປະເທດບຣິກສ໌ ພວມຢູ່ໃນໄລຍະສຳຄັນແຫ່ງການເຕີບໂຕ ເຊິ່ງຈາກນີ້, ຜູ້ນຳປະເທດບຣິກສ໌ ຈຶ່ງຕັດສິນໃຈຕ້ອງຊຸກຍູ້ກົນໄກດັ່ງກ່າວໃຫ້ຂະຫຍາຍຕົວຕື່ມອີກ.
ທ່ານ ຊູວາລົຟ ກ່າວວ່າ, ທະນາຄານພັດທະນາໃໝ່ປະເທດບຣິກສ໌ ໄດ້ເລີ່ມດຳເນີນງານແລ້ວ ທັງໄດ້ປະກາດໂຄງການພັດທະນາໃໝ່ຈຳນວນໜຶ່ງໃນໄລຍະກອງປະຊຸມຜູ້ນຳປະເທດບຣິກສ໌ທີ່ຫາກໍ່ປິດລົງຢູ່ເມືອງເຊ້ຍເມິນ ສປ ຈີນ. ແນວໃດກໍດີ, ຣັດເຊຍດີໃຈທີ່ໄດ້ເຫັນກົນໄກໃໝ່ແລະອົງການໃໝ່ທີ່ມີຈຸດປະສົງເພີ່ມທະວີການຮ່ວມມືດ້ານເງິນຕາ. ສ່ວນການຮ່ວມມືເສດຖະກິດຂອງປະເທດບຣິກສ໌ ຈະຊ່ວຍຣັດເຊຍສ້າງເສດຖະກິດແບບຫົວຄິດປະດິດສ້າງ ເປັນເອກະລາດເປັນເຈົ້າຕົນເອງ ທັງເຊື່ອມໂຍງກັບຄູ່ຮ່ວມມືຢ່າງເລິກເຊິ່ງ ທັງຈະຊ່ວຍຍົກລະດັບຊີວິດການເປັນຢູ່ຂອງປະຊາຊົນຣັດເຊຍໃຫ້ສູງຂຶ້ນ. ສະນັ້ນ, ຣັດເຊຍຈະສືບຕໍ່ຊຸກຍູ້ກົນໄກການຮ່ວມມືປະເທດບຣິກສ໌ໃຫ້ຂະຫຍາຍຕົວ.