ມຽນມາ-ອິນເດຍເຫັນດີເພີ່ມທະວີການຮ່ວມມືຕ້ານການກໍ່ການຮ້າຍ

ກະຊວງທຳນຽບທີ່ປຶກສາແຫ່ງລັດມຽນມາໄດ້ອອກຖະແຫຼງການຮ່ວມມຽນມາ-ອິນເດຍໃນວັນທີ 7 ກັນຍານີ້ວ່າ ສອງປະເທດຈະຮ່ວມມືຕ້ານການກໍ່ການຮ້າຍ.

ຖະແຫຼງການຮ່ວມລະບຸວ່າ: ອິນເດຍໄດ້ປະນາມເຫດການໂຈມຕີກໍ່ການຮ້າຍທີ່ເກີດຂຶ້ນຢູ່ເຂດຍະໄຂ່ປະເທດມຽນມາໃນໄລຍະມໍ່ໆມານີ້, ຂະນະທີ່ສອງຝ່າຍເປັນເອກະພາບກັນເຫັນວ່າ ລັດທິກໍ່ການຮ້າຍເປັນໄພຂົ່ມຂູ່ຕໍ່ສັນຕິພາບ,ສະຖຽນລະພາບຂອງພາກພື້ນຢ່າງໜັກໜ່ວງໃນປັດຈຸບັນ ທັງຮຽກຮ້ອງໃຫ້ປະຊາຄົມໂລກຮັບຮອງເອົາສັນຍາຮອບດ້ານວ່າດ້ວຍການຕ້ານລັດທິກໍ່ການຮ້າຍສາກົນໂດຍໄວ. ຂະນະດຽວກັນ,ຖະແຫຼງການຍັງລະບຸຕື່ມວ່າ ສອງຝ່າຍ ຈະເພີ່ມທະວີການຮ່ວມມືໃນຂົງເຂດປ້ອງກັນປະເທດ,ປ້ອງກັນຊາຍແດນແລະອື່ນໆຕື່ມອີກ.

ໃນໂອກາດທີ່ທ່ານນາເຣັນດຣາ ໂມດີ ນາຍົກລັດຖະມົນຕີອິນເດຍຢ້ຽມຢາມມຽນມາແຕ່ວັນທີ 5-7 ກັນຍານີ້,ທ່ານໄດ້ພົບປະກັບທ່ານນາງອ໋ອງຊານຊູຈີ ທີ່ປຶກສາແຫ່ງລັດມຽນມາໂດຍທີ່ປຶກສາແຫ່ງລັດມຽນມາໄດ້ຕີລາຄາສູງຕໍ່ຫຼັກໝັ້ນຂອງອິນເດຍທີ່ປະຕິບັດໃນກໍລະນີທີ່ປະເທດຕົນກຳລັງຜະເຊີນໄພຂົ່ມຂູ່ຈາກລັດທິກໍ່ການຮ້າຍ. ຂະນະທີ່ທ່ານໂມດີກໍຢືນຢັນຈະຍົກລະດັບສາຍພົວພັນມິດຕະພາບລະຫວ່າງສອງຝ່າຍໃຫ້ສູງຂຶ້ນຕື່ມແລະເພີ່ມທະວີການຮ່ວມມືໃນຂົງເຂດກໍ່ສ້າງພື້ນຖານໂຄງລ່າງ,ຄົມມະນາຄົມ, ສາທາລະນະສຸກແລະອື່ນໆ.