ຕາມຂ່າວ CRI: ໃນພິທີຖະແຫຼງຂ່າວທີ່ຈັດຂຶ້ນຢູ່ເມືອງນານນິງເຂດກວາງຊີ ສປ ຈີນໃນວັນທີ 11 ກັນຍານີ້, ທ່ານກ່າວເຟີ່ງ ໂຄສົກກະຊວງການຄ້າຈີນກ່າວວ່າ, ງານວາງສະແດງສິນຄ້າຈີນ-ອາຊຽນແລະກອງປະຊຸມສຸດຍອດການຄ້າແລະການລົງທຶນຈີນ-ອາຊຽນຄັ້ງທີ 14 ຈະຈັດຂຶ້ນຢູ່ເມືອງນານນິງແຕ່ວັນທີ 12 ຫາວັນທີ 15 ກັນຍານີ້. ແລະພິເສດງານວາງສະແດງປີນີ້ໄດ້ເຊີນກາຊັກສະຖານເຂົ້າຮ່ວມ, ທັງສະແດງໃຫ້ເຫັນຄວາມຕ້ອງການຮີບດ່ວນຂອງສອງຝ່າຍໃນການເພີ່ມທະວີການຮ່ວມມືແລະຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21.
ທ່ານກ່າວເຟີ່ງກ່າວຕື່ມວ່າ, ທ່ານຈ່າງກ່າວລີ້ ຮອງນາຍົກລັດຖະມົນຕີຈີນ, ທ່ານສອມໄຊ ສີພັນດອນ ຮອງນາຍົກລັດຖະມົນຕີລາວ, ສົມເດັດຮາຈິ ຮະຊັນນານ ໂບເກຍ ຊຸນຕານ ຊູດັງຂອງບຣູໄນ, ທ່ານຮຸນແຊນ ນາຍົກລັດຖະມົນຕີກຳປູເຈຍ, ທ່ານເຈືອງຮົວບິງ ຮອງນາຍົກລັດຖະມົນຕີປະຈຳການຫວຽດນາມຈະເຂົ້າຮ່ວມງານວາງສະແດງສິນຄ້າຈີນ-ອາຊຽນ. ຂະນະທີ່ຮອງນາຍົກທີໜຶ່ງຂອງກາຊັກສະຖານກໍຈະເຂົ້າຮ່ວມກອງປະຊຸມໂດຍຕອບສະໜອງຕາມຄຳເຊີນ, ແລະນີ້ແມ່ນງານວາງສະແດງສິນຄ້າຈີນ-ອາຊຽນທີ່ມີຜູ້ນຳບໍ່ແມ່ນປະເທດອາຊຽນເຂົ້າຮ່ວມເປັນຄັ້ງທຳອິດ.
ງານວາງສະແດງສິນຄ້າຈີນ-ອາຊຽນຄັ້ງນີ້ໄດ້ເລີ່ມເປີດນຳໃຊ້ຫໍວາງສະແດງທີ່ສ້າງໃໝ່, ມີຂະໜາດໃຫຍ່ກວ່າຄັ້ງທີ່ຜ່ານມາ. ເນື້ອທີ່ວາງສະແດງກໍມີເຖິງ 1 ແສນ 2 ໝື່ນ 4 ພັນຕາແມັດ, ມີຮ້ານວາງສະແດງ 6600 ຮ້ານ. ມີ 8 ປະເທດໃນອາຊຽນໄດ້ເໝົາຮ້ານວາງສະແດງພິເສດ, ບຣູໄນເຊິ່ງເປັນປະເທດກິດຕິມະສັກຕໍກໍໄດ້ເໝົາຮ້ານວາງສະແດງເປັນຄັ້ງທຳອິດ. ໃນໄລຍະຈັດງານວາງສະແດງຄັ້ງນີ້, ຈະຈັດກອງປະຊຸມເວທີປຶກສາຫາລືແລະງານວາງສະແດງທີ່ກວມເອົາຂົງເຂດຫຼາຍກວ່າເກົ່າແລະເລິກເຊິ່ງກວ່າໂດຍເນັ້ນຫົວຂໍ້ "ເສັ້ນທາງສາຍໄໝທາງທະເລໃນສະຕະວັນທີ 21", ເພື່ອຍົກສູງລະດັບການບໍລິການຂອງງານວາງສະແດງສິນຄ້າຈີນ-ອາຊຽນ.