ເວລາ 12 ໂມງຂອງວັນທີ 12 ກັນຍານີ້, ກຳປັ່ນ "ໄຫຊູ 2"ທີ່ບັນທຸກຕູ້ຄອນທິນເນີໄດ້ເຂົ້າທຽບທ່າຊິ້ວຢິ່ງເມືອງໄຫໂຂວ ແຂວງໄຫຫຼຳ ສປ ຈີນແລ້ວ ຖືວ່ານີ້ຄືສິນຄ້ານຳເຂົ້າຊຸດທຳອິດທີ່ມາເຖິງເມືອງໄຫໂຂວ ຫຼັງຂົນສົ່ງມາຕາມເສັ້ນທາງໄຫໂຂວ-ຟີລິບປິນ ແລະເປັນຂີດໝາຍສະແດງໃຫ້ເຫັນວ່າ ການເດີນເຮືອຄັ້ງທຳອິດຂອງເສັ້ນທາງກຳປັ່ນດັ່ງກ່າວປະສົບຜົນສຳເລັດຢ່າງຈົບງາມ.
ຂ່າວແຈ້ງວ່າ: ການຂົນສົ່ງຖ້ຽວນີ້,ກຳປັ່ນໄດ້ບັນທຸກຕູ້ຄອນທິນເນີຂະໜາດ 20 ຟຸດ 68 ຕູ້, ຕູ້ຄອນທິນເນີຂະໜາດ 40 ຟຸດ 77 ຕູ້ ແລະຕູ້ເປົ່າ 5 ຕູ້ ໂດຍນ້ຳໜັກລວມ 3412 ໂຕນ, ໃນຕູ້ຄອນທິນເນີດັ່ງກ່າວໄດ້ບັນທຸກສິນຄ້າຕ່າງໆເຊັ່ນວຸ້ນໝາກພ້າວ,ໝາກພ້າວ,ແປ້ງມັນຕົ້ນ, ໄມ້ອັດ ແລະອື່ນໆ.
ການເປີດເສັ້ນທາງກຳປັ່ນຂົນສົ່ງຕູ້ຄອນທິນເນີ "ໄຫໂຂວ-ຟີລິບປິນ" ເປັນໜຶ່ງໃນບັນດາໂຄງການຮ່ວມມືລະຫວ່າງເມືອງໄຫໂຂວກັບຟີລິບປິນທີ່ໄດ້ລົງນາມໃນເດືອນກໍລະກົດຜ່ານມາ ທັງເປັນຜົນງານການຮ່ວມມືລະຫວ່າງຈີນ-ຟີລິບປິນໃນການເຊື່ອມຈອດທາງທະເລຮ່ວມສ້າງ "ໜຶ່ງແລວທາງໜຶ່ງເສັ້ນທາງ".