ວັນທີ 16 ກັນຍານີ້ ທ່ານຊາງວ້ານຊວນ ທີ່ປຶກສາແຫ່ງລັດຈີນ ທັງເປັນລັດຖະມົນຕີກະຊວງປ້ອງກັນປະເທດຈີນໄດ້ສຳເລັດການຢ້ຽມຢາມຢູ່ ສປປ ລາວ, ມື້ດຽວກັນ ຈີນ-ລາວໄດ້ອອກປະກາດແຈ້ງການຮ່ວມໂດຍກ່າວວ່າ:
ໃນໄລຍະທ່ານພົນເອກຊາງວ້ານຊວ ຢ້ຽມຢາມສັນຖະວະໄມຕີຢູ່ລາວຢ່າງເປັນທາງການ , ທ່ານໄດ້ຮ່ວມກັບທ່ານຈັນສະໝອນ ຈັນຍາເປັນປະທານຈັດການພົບປະລະດັບສູງກ່ຽວກັບເຂດຊາຍແດນລະຫວ່າງສອງກອງທັບຈີນ-ລາວ ເຊິ່ງໄດ້ຮັບຜົນສຳເລັດຢ່າງຈົບງາມ, ອັນໄດ້ສະແດງໃຫ້ເຫັນເຖິງຄວາມສາມັກຄີ ແລະມິດຕະພາບລະຫວ່າງສອງກອງທັບ, ແລະໄດ້ປະກອບສ່ວນຢ່າງສຳຄັນໃນການສ້າງເຂດຊາຍແດນຈີນ-ລາວໃຫ້ມີສັນຕິພາບ ໄມຕີຈິດມິດຕະພາບ, ໝັ້ນຄົງຍາວນານແລະມີການພັດທະນາຢ່າງຈະເລີນຮຸ່ງເຮືອງ.
ຈີນ-ລາວໄດ້ສະແດງຄວາມເພິ່ງພໍໃຈຕໍ່ການພົວພັນມິດຕະພາບແລະຮ່ວມມືກັນລະຫວ່າງສອງປະເທດແລະສອງກອງທັບໄດ້ຮັບການຂະຫຍາຍຕົວຢ່າງຕໍ່ເນື່ອງແລະເລິກເຊິ່ງ; ກ່າວເນັ້ນວ່າຈະຍຶດໝັ້ນການນຳພາຂອງພັກ, ຍຶດໝັ້ນເດີນຕາມເສັ້ນທາງສັງຄົມນິຍົມ, ຜັນຂະຫຍາຍຄວາມເປັນເອກະພາບທີ່ສຳຄັນຂອງຜູ້ນຳສອງພັກແລະສອງລັດຖະບານ ໂດຍສະເພາະແມ່ນຄວາມເປັນເອກະພາບກັນຂອງທ່ານເລຂາທິການໃຫຍ່ສີຈິ້ນຜິງ ແລະທ່ານເລຂາທິການໃຫຍ່ບຸນຍັງ ວໍລະຈິດກ່ຽວກັບການຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດຈີນ-ລາວ.
ສອງຝ່າຍເປັນເອກະສັນກັນເຫັນດີໃຫ້ສອງກອງທັບມີການໄປມາຫາສູ່ກັນລະດັບສູງຫຼາຍຂຶ້ນ; ສືບຕໍ່ດຳເນີນການແລກປ່ຽນແລະຮ່ວມມືກັນໃນດ້ານການປ້ອງກັນເຂດຊາຍແດນ, ຈັດການລາດຕະເວນຮ່ວມ ການຕ້ານການກໍ່ການຮ້າຍແລະການເຄື່ອນໄຫວອື່ນໆເປັນປະຈຳ, ຮ່ວມກັນປົກປັກຮັກສາສັນຕິພາບແລະຄວາມໝັ້ນຄົງຂອງຊາຍແດນ. ຈີນສະໜັບສະໜູນການສ້າງສາແລະການພັດທະນາຂອງກອງທັບລາວ, ຈະສືບຕໍ່ໃຫ້ການຊ່ວຍເຫຼືອແກ່ກອງທັບລາວຕາມຄວາມສາມາດ.
 |
