ວັນທີ 15 ກັນຍານີ້, ສະພາຄວາມໝັ້ນຄົງສະຫະປະຊາຊາດໄດ້ອອກຖະແຫຼງການ ໂດຍກ່າວປະນາມຢ່າງເຂັ້ມງວດຕໍ່ ສປປ ເກົາຫຼີ ທີ່ຍິງລູກສອນໄຟນຳວິຖີອີກເທື່ອໜຶ່ງ ແລະຊີ້ອອກວ່ານີ້ແມ່ນການກະທຳທ້າທາຍທີ່ໜັກໜ່ວງເທື່ອໜຶ່ງຕໍ່ປະຊາຄົມໂລກ.
ໂດຍອີງຕາມຄວາມຮຽກຮ້ອງຕ້ອງການຂອງຄະນະຜູ້ແທນອາເມລິກາແລະຍີ່ປຸ່ນທີ່ປະຈຳອົງການສະຫະປະຊາຊາດ, ຕອນບ່າຍວັນທີ 15 ກັນຍານີ້, ສະພາຄວາມໝັ້ນຄົງສະຫະປະຊາຊາດໄດ້ຈັດກອງປະຊຸມພາຍໃນເພື່ອປຶກສາຫາລືກ່ຽວກັບ ສປປ ເກົາຫຼີ ຍິງລູກສອນໄຟນຳວິຖີອີກເທື່ອໜຶ່ງ, ຫຼັງກອງປະຊຸມ ໄດ້ອອກຖະແຫຼງການ ໂດຍໄດ້ກ່າວປະນາມຢ່າງເຂັ້ມງວດຕໍ່ການຍິງລູກສອນໄຟນຳວິຖີໃນຫວ່າງມໍ່ໆນີ້ກໍຄືຫຼາຍຄັ້ງທີ່ຜ່ານມາ ແລະຮຽກຮ້ອງໃຫ້ ສປປ ເກົາຫຼີ ຢຸດຕິການກະທຳແບບນີ້ທັງໝົດໃນທັນທີ.
ຖະແຫຼງການຊີ້ວ່າ: ສະພາຄວາມໝັ້ນຄົງສະຫະປະຊາຊາດເຫັນວ່າການຍິງລູກສອນໄຟຂອງ ສປປ ເກົາຫຼີ ຄັ້ງນີ້ກໍຄືກິລິຍາວາຈາຕ່າງໆໃນຫວ່າງມໍ່ໆນີ້ ເປັນການເຈດຕະນາທຳລາຍສັນຕິພາບແລະສະຖຽນລະພາບຂອງພາກພື້ນ ເຮັດໃຫ້ທົ່ວໂລກຮູ້ສຶກເປັນຫ່ວງຢ່າງໜັກໜ່ວງ. ສະພາຄວາມໝັ້ນຄົງອົງການສະຫະປະຊາຊາດເນັ້ນວ່າ: ການກະທຳຂອງ ສປປ ເກົາຫຼີ ເຫຼົ່ານີ້ບໍ່ພຽງແຕ່ເປັນການຂົ່ມຂູ່ຕໍ່ພາກພື້ນເທົ່ານັ້ນ ຍັງເປັນການຂົ່ມຂູ່ຕໍ່ປະເທດສະມາຊິກທັງໝົດຂອງອົງການສະຫະປະຊາຊາດອີກດ້ວຍ.
ຖະແຫຼງການຍັງໄດ້ຢ້ຳຄວາມສຳຄັນຕໍ່ການຮັກສາສັນຕິພາບແລະສະຖຽນລະພາບຂອງແຫຼມເກົາຫຼີແລະອາຊີຕາເວັນອອກສຽງເໜືອ ແລະເນັ້ນວ່າຄວນຜ່ານ "ຊ່ອງທາງສັນຕິພາບ,ການຕ່າງປະເທດແລະການເມືອງ" ມາແກ້ໄຂວິກິດການ.
ກອງບັນຊາການມະຫາສະໝຸດປາຊີຟິກຂອງກອງທັບອາເມລິກາກ່າວວ່າ: ໃນເວລາ 4 ໂມງ 57 ນາທີຂອງວັນທີ 15 ກັນຍານີ້ຕາມເວລາວຽງຈັນ ໄດ້ເຫັນວ່າ ສປປ ເກົາຫຼີ ດຳເນີນການທົດລອງຍິງລູກສອນໄຟນຳວິຖີ. ລູກສອນໄຟໄດ້ບິນຜ່ານທ້ອງຟ້າທາງພາກເໜືອຂອງຍີ່ປຸ່ນ ແລະໃນທີ່ສຸດໄດ້ຕົກຢູ່ເຂດທະເລມະຫາສະໝຸດປາຊີຟິກ ໄປທາງທິດຕາເວັນອອກຂອງຍີ່ປຸ່ນ.