ທຳນຽບຂາວອາເມລິກາປະກາດໃນວັນທີ 15 ກັນຍານີ້ວ່າ: ທ່ານ ໂດນັນ ທຣຳ ປະທານາທິບໍດີອາເມລິກາຈະເດີນທາງໄປສຳນັກງານໃຫຍ່ຂອງອົງການສະຫະປະຊາຊາດທີ່ນິວຢອກໃນອາທິດໜ້າ ເພື່ອເຂົ້າຮ່ວມສະມັດຊາໃຫຍ່ອົງການສະຫະປະຊາຊາດຄັ້ງທີ 72 ພ້ອມທັງຈະກ່າວປາຖະກະຖາ. ນີ້ຈະແມ່ນທ່ານ ໂດນັນ ທຣຳ ເຂົ້າຮ່ວມສະມັດຊາໃຫຍ່ເປັນຄັ້ງທຳອິດນັບແຕ່ດຳລົງຕຳແໜ່ງເປັນຕົ້ນມາ.
ໃນການຖະແຫຼງຂ່າວທີ່ຈັດຂຶ້ນຢູ່ທຳນຽບຂາວໃນມື້ດັ່ງກ່າວ, ທ່ານ ເຮີເບີດ ມັກມັສເຕີ ຜູ້ຊ່ວຍວຽກງານດ້ານຄວາມໝັ້ນຄົງແຫ່ງຊາດຂອງປະທານາທິບໍດີອາເມລິກາ ແລະ ທ່ານນາງ ນິກຄີ ຮາເລ ຜູ້ຕາງໜ້າອາເມລິກາປະຈຳອົງການສະຫະປະຊາຊາດໄດ້ແຈ້ງໃຫ້ຮູ້ກ່ຽວກັບການເຂົ້າຮ່ວມກອງປະຊຸມຄັ້ງນີ້ຂອງທ່ານ ໂດນັນ ທຣຳ.
ທ່ານ ມັກມັສເຕີ ໃຫ້ຮູ້ວ່າ: ການເດີນທາງຂອງທ່ານ ໂດນັນ ທຣຳເປັນເວລາ 4 ວັນໂດຍຈະເຂົ້າຮ່ວມກອງປະຊຸມກ່ຽວກັບການປະຕິຮູບອົງການສະຫະປະຊາຊາດໃນວັນທີ 18 ກັນຍານີ້ ເຊິ່ງເປັນກິດຈະກຳຮອບທຳອິດ. ຈາກນັ້ນມື້ຕໍ່ໄປ, ທ່ານ ໂດນັນ ທຣຳ ຈະກ່າວປາຖະກະຖາໃນກອງປະຊຸມອະພິປາຍທົ່ວໄປຂອງສະມັດຊາໃຫຍ່ອົງການສະຫະປະຊາຊາດ ແລະພົບປະກັບທ່ານ ອັນໂຕນີໂອ ກູເຕີຣິສ໌ ເລຂາທິການໃຫຍ່ອົງການສະຫະປະຊາຊາດ ແລະ ທ່ານ ມິໂຣສລັຟ ລາຈາຄັກ ປະທານສະມັດຊາໃຫຍ່ອົງການສະຫະປະຊາຊາດຄັ້ງນີ້.