ວັນທີ 16 ກັນຍານີ້, ພິທີໄຂກອງປະຊຸມໃຫຍ່ນັກທຸລະກິດຊາວຈີນໂລກຄັ້ງທີ 14 ໄດ້ຈັດຂຶ້ນຢູ່ສູນປະຊຸມມຽນມາທີ່ນະຄອນຢາງກຸງຂອງມຽນມາຢ່າງຄຶກຄື້ນ, ຜູ້ນຳນັກທຸລະກິດຊາວຈີນທີ່ມາຈາກປະເທດຈີນແລະແຫ່ງຕ່າງໆຂອງໂລກທັງໝົດ 2000 ກວ່າທ່ານໄດ້ເຕົ້າໂຮມກັນຢູ່ບ່ອນນີ້ ເພື່ອປຶກສາຫາລືທິດທາງພັດທະນາຮ່ວມກັນ.
ກອງປະຊຸມໃຫຍ່ຄັ້ງນີ້ມີຫົວຂໍ້ທີ່ວ່າ"ເສດຖະກິດມຽນມາເປີດປະຕູສູ່ພາຍນອກ, ສ້າງຍຸກສະໄໝໃໝ່ແຫ່ງປະຫວັດສາດ",ໂດຍມີຈຸດປະສົງເພື່ອສ້າງເຄືອຄ່າຍຕິດຕໍ່ພົວພັນດ້ານເສດຖະກິດການຄ້າລະຫວ່າງມຽນມາກັບນັກທຸລະກິດຊາວຈີນຂອງໂລກ. ອາໄສອາຊຽນແລະສະພາບການໃໝ່ທາງດ້ານເສດຖະກິດ"ໜຶ່ງແລວທາງໜຶ່ງເສັ້ນທາງ", ໂຮມສູນແນວຄິດແລະຄວາມເຫັນຕ່າງໆ, ປຶກສາຫາລືຮ່ວມກັນກ່ຽວກັບທິດແລະຊ່ອງທາງພັດທະນາໃນອະນາຄົດຂອງນັກທຸລະກິດຊາວຈີນທົ່ວໂລກ ພ້ອມທັງເສດຖະກິດມຽນມາກໍຄືຂອງໂລກ.
ໃນພິທີໄຂກອງປະຊຸມ, ທ່ານສູໂຢ້ເຊິ່ງ ຮອງຫົວໜ້າຫ້ອງການວຽກງານຊາວຈີນຕ່າງດ້າວລັດຖະບານຈີນ ຮອງປະທານສະມາຄົມແລກປ່ຽນກັບຕ່າງປະເທດຂອງຈີນໄດ້ອ່ານຈົດໝາຍອວຍພອນຈາກທ່ານຢູເຈິ້ງເຊິ່ງ ກຳມະການກົມການເມືອງສູນກາງພັກກອມມູນິດຈີນ ປະທານສະພາປຶກສາການເມືອງປະຊາຊົນຈີນ. ທ່ານມິນສເວ ຮອງປະທານາທິບໍດີຜູ້ທຳອິດຂອງມຽນມາພ້ອມທັງບຸກຄົນວົງການການເມືອງມຽນມາຫຼາຍທ່ານໄດ້ເຂົ້າຮ່ວມພິທີໄຂຄັ້ງນີ້.
ທ່ານມິນສເວກ່າວຄຳປາໄສວ່າ: ການຈັດກອງປະຊຸມນັກທຸລະກິດຊາວຈີນໂລກຢູ່ມຽນມາ ບໍ່ພຽງແຕ່ໄດ້ຊຸກຍູ້ໃຫ້ການພົວພັນໄມຕີຈິດມິດຕະພາບລະຫວ່າງມຽນມາກັບຈີນມີການຂະຫຍາຍຕົວເທົ່ານັ້ນ, ຍັງຈະອຳນວຍໂອກາດໃຫ້ແກ່ນັກທຸລະກິດຊາວຈີນໂລກໃນການເປີດກວ້າງການລົງທຶນຢູ່ມຽນມາອີກດ້ວຍ. ມຽນມາມີໂອກາດການລົງທຶນໃນຫຼາຍຂົງເຂດເຊັ່ນ ອຸດສາຫະກຳ ການກໍ່ສ້າງ ກະສິກຳ ການລ້ຽງສັດ ໄຟຟ້າແລະພະລັງງານ ການຂົນສົ່ງແລະສື່ສານ ການທ່ອງທ່ຽວ ການຄ້າ ແລະອື່ນໆ, ຫວັງໃຫ້ກອງປະຊຸມໃຫຍ່ຈະສ້າງໂອກາດທີ່ດີໃຫ້ແກ່ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດລະຫວ່າງນັກທຸລະກິດຊາວຈີນໂລກກັບວິສາຫະກິດຂອງມຽນມາ.
ກອງປະຊຸມໃຫຍ່ຄັ້ງນີ້ມີສະຫະພັນນັກທຸລະກິດຈີນຂອງມຽນມາເປັນເຈົ້າພາບ. ໃນໄລຍະຈັດກອງປະຊຸມ, ໄດ້ຈັດໃຫ້ມີກິດຈະກຳຕ່າງໆເຊັ່ນ ເວທີປຶກສາຫາລືກ່ຽວກັບຫົວຂໍ້ສະເພາະ ການສັງສັນເສດຖະກິດການຄ້າ ການສະແດງສິລະປະວັດທະນະທຳຂະໜາດໃຫຍ່ ແລະອື່ນໆ.
 |
