ວັນທີ 17 ກັນຍານີ້ ຕາມເວລາທ້ອງຖິ່ນ, ທ່ານຫວາງຢີ້, ລັດຖະມົນຕີກະຊວງການຕ່າງປະເທດຈີນ ແລະທ່ານຮູອັນ ຄາລອສ ວາເຣລາ ປະທານາທິບໍດີບານາມາ ໄດ້ເຂົ້າຮ່ວມພິທີສ້າງຕັ້ງສະຖານທູດຈີນປະຈຳບານາມາ ຢູ່ນະຄອນບານາມາ.
ທ່ານຫວາງຢີ້ ກ່າວວ່າ: ຂ້າພະເຈົ້າ ແລະ ທ່ານປະທານາທິບໍດີວາເຣລາ ໄດ້ຮ່ວມກັນເປີດປ້າຍສະຖານທູດຈີນປະຈຳບານາມາ ເຊິ່ງເປັນໄລຍະປະຫວັດສາດຂອງການພົວພັນລະຫວ່າງສອງປະເທດ. ເຖິງວ່າຈີນແລະບານາມາຫ່າງໄກກັນ ແລະຂັ້ນດ້ວຍມະຫາສະໝຸດກໍຕາມ, ແຕ່ການໄປມາຫາສູ່ກັນດ້ວຍໄມຕີຈິດມິດຕະພາບລະຫວ່າງສອງປະເທດໄດ້ມີມູນເຊື້ອມາແຕ່ດົນນານ ແລະເຖິງວ່າການພົວພັນລະຫວ່າງສອງປະເທດປະສົບອຸປະສັກກໍຕາມ, ແຕ່ໃນທີ່ສຸດກໍສາມາດພັດທະນາກ້າວໄປຕາມຍຸກສະໄໝ. ແນວໃດກໍດີ, ປະຫວັດສາດຈະຢັ້ງຢືນວ່າ ການທີ່ບານາມາສ້າງສາຍພົວພັນທາງການທູດກັບຈີນນັ້ນ ລ້ວນແຕ່ສອດຄ່ອງກັບຜົນປະໂຫຍດພື້ນຖານແລະຍາວນານຂອງສອງປະເທດ ທັງຈະສ້າງອະນາຄົດທີ່ສົດໃສຕໍ່ການພັດທະນາບານາມາ ແລະ ສ້າງຄວາມຜາສຸກໃຫ້ແກ່ປະຊາຊົນບານາມາຫຼາຍກວ່າເກົ່າ. ແນວໃດກໍດີ, ຈີນຍິນດີຮ່ວມມືກັບບານາມາ ແລະ ພະຍາຍາມຮ່ວມກັນ ປັບປຸງຄວາມໄວ້ເນື້ອເຊື່ອໃຈກັນດ້ານການເມືອງລະຫວ່າງສອງປະເທດ, ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດລະຫວ່າງສອງຝ່າຍ, ສ້າງພື້ນຖານຄວາມເປັນຈິດໜຶ່ງໃຈດຽວກັນໃຫ້ໜັກແໜ້ນ ເພື່ອເຮັດໃຫ້ການພົວພັນລະຫວ່າງສອງປະເທດພັດທະນາຢ່າງໝັ້ນທ່ຽງຖາວອນ ແລະກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ.