ເຈົ້າໜ້າທີ່ຕຳຫຼວດມາເລເຊຍ ຢືນຢັນໃນວັນທີ 16 ກັນຍານີ້ວ່າ: ສາມາດຈັບຜູ້ຕ້ອງສົງໄສໃນເຫດໄຟໄໝ້ໂຮງຮຽນສາສະໜາ ນະຄອນຫຼວງກວາລາລຳເປີ ໃນວັນທີ 14 ກັນຍານີ້ໄດ້ 7 ຄົນ ໂດຍສັນນິຖານວ່າ ອາດເປັນການແກ້ແຄ້ນຫຼັງຖົກຖຽງກັນ.
ທັງນີ້, ທ່ານອາມາ ຊິງ ເຈົ້າໜ້າທີ່ຕຳຫຼວດກວາລາລຳເປີ ໄດ້ກ່າວວ່າ: ເຈົ້າໜ້າທີ່ຕຳຫຼວດຈັບຜູ້ຕ້ອງສົງໄສທັງ 7 ຄົນດັ່ງກ່າວໄດ້ ຫຼັງເປີດກ້ອງວົງຈອນປິດທີ່ຕິດຕັ້ງຢູ່ບໍລິເວນໃກ້ໂຮງຮຽນທີ່ເກີດໄຟໄໝ້ ເຊິ່ງຜູ້ຕ້ອງສົງໄສເຫຼົ່ານີ້ ມີອາຍຸລະຫວ່າງ 11-18 ປີ ແລະພວມປະການຮຽນ ໃນນີ້ມີ 6 ຄົນຜົນກວດຍ່ຽວເປັນບວກຍ້ອນສູບກັນຊາ ແລະ 2 ຄົນເຄີຍກະທຳຜິດ.
ຕອນຮຸ່ງເຊົ້າວັນທີ 14 ກັນຍານີ້, ໂຮງຮຽນສາສະໜາແຫ່ງໜຶ່ງຢູ່ນະຄອນຫຼວງກວາລາລຳເປີ ໄດ້ເກີດໄຟໄໝ້ ສົ່ງຜົນເຮັດໃຫ້ 23 ຄົນເສຍຊີວິດ ໃນນີ້ ນັກຮຽນອາຍຸລະຫວ່າງ 6-17 ປີ 21 ຄົນ ແລະຄູສອງຄົນ. ເບື້ອງຕົ້ນ, ເຈົ້າໜ້າທີ່ຕຳຫຼວດ ແລະ ເຈົ້າໜ້າທີ່ດັບເພີງມາເລເຊຍ ເຄີຍກ່າວວ່າ ອັກຄີໄພດັ່ງກ່າວອາດຍ້ອນໄຟຟ້າລັດວົງຈອນ, ແຕ່ຫຼັງສືບສວນ-ສອບສວນແລ້ວພົບວ່າ ບໍ່ແມ່ນຍ້ອນໄຟຟ້າລັດວົງຈອນແຕ່ປະການໃດ.