ແຫຼ່ງຂ່າວຈາກກອງປະຊຸມເວທີປຶກສາຫາລືການຮ່ວມມືແລະພັດທະນາພະລັງໄຟຟ້າຈີນ-ອາຊຽນ ທີ່ຈັດຂຶ້ນຢູ່ເມືອງໜານໜິງ ສປ ຈີນ ເມື່ອບໍ່ດົນມານີ້ໃຫ້ຮູ້ວ່າ: ການຮ່ວມມືດ້ານພະລັງໄຟຟ້າລະຫວ່າງຈີນແລະປະເທດໃນອາຊຽນ ໄດ້ມີປະສິດທິຜົນຢ່າງພົ້ນເດັ່ນ ໂດຍຍອດການລົງທຶນຕົວຈິງ ແລະ ການຈັດຕັ້ງປະຕິບັດໂຄງການຕ່າງໆ ກໍຄືບໜ້າໄວຂຶ້ນ.
ທ່ານຢາງຄຸ່ນ ຮອງປະທານສະມາຄົມວິສາຫະກິດພະລັງໄຟຟ້າຈີນ ຜູ້ປະຈຳການ ກ່າວວ່າ: ເມື່ອປີ 2016, ບໍລິສັດຕາໜ່າງໄຟຟ້າພາກໃຕ້ຈີນຈຳກັດ ໄດ້ມອບສິດໃຫ້ບໍລິສັດສາກົນຢຸນນານຈຳກັດທີ່ຂຶ້ນກັບບໍລິສັດຕົນ ແລະລັດວິສາຫະກິດໄຟຟ້າລາວ ແລະຫວຽດນາມ ລົງນາມໃນ "ບົດບັນທຶກຄວາມເຂົ້າໃຈກ່ຽວກັບໂຄງການຈີນສົ່ງໄຟຟ້າແຮງສູງຜ່ານລາວໃຫ້ຫວຽດນາມ" ຢູ່ເມືອງຄຸນມິງ ສປ ຈີນ ໂດຍເນື້ອໃນບົດບັນທຶກລະບຸວ່າ: 3 ປະເທດ ໄດ້ບັນລຸຂໍ້ຕົກລົງເບື້ອງຕົ້ນໃຫ້ຈີນ ສົ່ງໄຟຟ້າໄປໃຫ້ຫວຽດນາມຜ່ານລາວ 5 ລ້ານຫາ 6 ລ້ານກິໂລວັດ ແຕ່ປີ 2021 ຫາປີ2025. ນີ້ເປັນໂຄງການທຳອິດໃນການເຊື່ອມຈອດຕາໜ່າງໄຟຟ້າຜ່ານປະເທດທີ 3 ຂອງຈີນ ເຊິ່ງເປັນຂີດໝາຍສະແດງໃຫ້ເຫັນວ່າ ການເຊື່ອມຈອດຕາໜ່າງໄຟຟ້າລະຫວ່າງຈີນ-ລາວ-ຫວຽດນາມມີຄວາມຄືບໜ້າຢ່າງແທ້ຈິງ.