ວັນທີ 18 ກັນຍານີ້, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ ໄດ້ພົບປະກັບທ່ານມີຣອສລາຟ ລາດຄັກ ປະທານກອງປະຊຸມສະມັດຊາໃຫຍ່ອົງການສະຫະປະຊາຊາດຊຸດທີ 72 ໃນໂອກາດເຂົ້າຮ່ວມກອງປະຊຸມໃຫຍ່ຂອງອົງການດັ່ງກ່າວຢູ່ນະຄອນນິວຢອກ.
ທ່ານຫວາງຢີ້ ກ່າວວ່າ: ຈີນສະໜັບສະໜູນອົງການສະຫະປະຊາຊາດເສີມຂະຫຍາຍບົດບາດທີ່ສຳຄັນໃນການປົກປັກຮັກສາສັນຕິພາບ ແລະ ຊຸກຍູ້ການພັດທະນາຮ່ວມກັນຂອງໂລກ ໃນຖານະເປັນອົງການຈັດຕັ້ງສາກົນທີ່ມີອິດທິພົນແລະເປັນຕົວແທນປະຊາຄົມໂລກຫຼາຍທີ່ສຸດ. ຂະນະທີ່ເມື່ອມໍ່ໆມານີ້, ບັນຫາການປະຕິຮູບຂອງອົງການສະຫະປະຊາຊາດໄດ້ຮັບຄວາມສົນໃຈຈາກຝ່າຍຕ່າງໆ ແນວໃດກໍດີ, ຈີນກໍສະໜັບສະໜູນການປະຕິຮູບດັ່ງກ່າວ ທັງຫວັງວ່າຂະບວນການປະຕິຮູບດັ່ງກ່າວຈະຄືບໜ້າຢ່າງໝັ້ນທ່ຽງບົນພື້ນຖານການຮັບຟັງຄວາມຄິດເຫັນຈາກບັນດາປະເທດສະມາຊິກຢ່າງເຕັມສ່ວນ.
ທ່ານລາດຄັກ ກ່າວວ່າ: ປະຊາຄົມໂລກຊົມເຊີຍຈີນທີ່ນັບມື້ໄດ້ເສີມຂະຫຍາຍບົດບາດທີ່ສຳຄັນໃນກິດຈະການສາກົນ ແລະຈາກນີ້, ສະຫະປະຊາຊາດຈະເພີ່ມທະວີການຮ່ວມມືກັບຈີນຕື່ມອີກ ເພື່ອຊຸກຍູ້ວຽກງານ 3 ຂົງເຂດ ຄື ຄວາມໝັ້ນຄົງ, ການພັດທະນາ ແລະ ສິດທິມະນຸດ ໃຫ້ສົມດູນກັນ. ພ້ອມກັນນັ້ນ, ສະຫະປະຊາຊາດກໍໃຫ້ຄວາມສຳຄັນຕໍ່ຄວາມເຫັນຂອງຈີນກ່ຽວກັບການປະຕິຮູບຂອງຕົນ ແລະຈະຊຸກຍູ້ຂະບວນການດັ່ງກ່າວແບບຄ່ອຍເປັນຄ່ອຍໄປ ທັງໃຫ້ປະເທດສະມາຊິກເປັນແກນນຳ.