ເວທີປຶກສາຫາລືຂັ້ນສູງການຮ່ວມມືດ້ານອຸດສາຫະກຳແລະການເງິນ ເຊິ່ງເປັນເວທີປຶກສາຫາລືຫົວຂໍ້ງານວາງສະແດງສາກົນເສັ້ນທາງສາຍໄໝທາງທະເລສະຕະວັດທີ 21 ກວາງຕຸ້ງ 2017 ທີ່ຈັດຂຶ້ນໂດຍອຳນາດການປົກຄອງເມືອງກວາງໂຈ່ວ ຈະຈັດຂຶ້ນຢູ່ເມືອງດັ່ງກ່າວໃນວັນທີ 22 ກັນຍານີ້.
ເວທີປຶກສາຫາລືຄັ້ງນີ້ຈະເນັ້ນຫົວຂໍ້ "ປຶກສາຫາລືຮ່ວມກັນ, ກໍ່ສ້າງຮ່ວມກັນ ແລະ ຊົມໃຊ້ຮ່ວມກັນ; ການຮ່ວມມືແລະພັດທະນາການເງິນແລະອຸດສາຫະກຳ" ໂດຍຈະຈັດກອງປະຊຸມຫົວຂໍ້ດັ່ງກ່າວ ພ້ອມດ້ວຍກອງປະຊຸມເວທີປຶກສາຫາລືຍ່ອຍ 3 ຄັ້ງ ຄື "ກໍ່ສ້າງຮ່ວມກັນ: ກ້າວສູ່ອາຟຣິກາ, ນະໂຍບາຍແລະໂອກາດການລົງທຶນຂອງອາຟຣິກາ", "ປຶກສາຫາລືຮ່ວມກັນ: ເວທີປຶກສາຫາລືອົງການຫົວກະທິສາກົນກວາງຕຸ້ງເສັ້ນທາງສາຍໄໝທາງທະເລສະຕະວັດທີ 21" ແລະ "ຕ່າງຝ່າຍຕ່າງມີຜົນປະໂຫຍດ: ການຮ່ວມມືແລະປະດິດສ້າງດ້ານການເງິນໃນຂອບໜຶ່ງແລວທາງໜຶ່ງເສັ້ນທາງ" ໂດຍຈະສຸມໃສ່ຄົ້ນຄວ້າ ແລະ ແລກປ່ຽນໃນຫົວຂໍ້ຕ່າງໆ ເປັນຕົ້ນ ການພົວພັນສາກົນແບບໃໝ່ພາຍໃຕ້ຍຸດທະສາດ "ເສັ້ນທາງສາຍໄໝທາງທະເລສະຕະວັດທີ 21", "ປະດິດສ້າງຮູບແບບການລົງທຶນ ແລະ ລະດົມທຶນ, ພັດທະນາການເງິນສາກົນທີ່ມີຫຼາຍເຄົ້າ", "ການຮ່ວມມືດ້ານອຸດສາຫະກຳ ແລະ ການເງິນ, ຮ່ວມກັນສ້າງເສັ້ນທາງແຫ່ງຄວາມຈະເລີນຮຸ່ງເຮືອງ", ປຶກສາຫາລືທິດທາງການຮ່ວມມືຮ່ວມກັນ, ເຕົ້າໂຮມຄວາມເປັນເອກະພາບຂອງການຮ່ວມມື ແລະປະຕິບັດໃຫ້ປາກົດຜົນເປັນຈິງ.
ທັງນີ້ ນັບແຕ່ປີ 2015 ເປັນຕົ້ນມາ, ເວທີປຶກສາຫາລືຫົວຂໍ້ງານວາງສະແດງເສັ້ນທາງສາຍໄໝທາງທະເລສະຕະວັດທີ 21 ຈັດຂຶ້ນປີລະເທື່ອຢູ່ເມືອງກວາງໂຈ່ວ ເຊິ່ງເປັນຕົ້ນທາງຂອງເສັ້ນທາງສາຍໄໝທາງທະເລ.