ວັນທີ 20 ກັນຍານີ້ຢູ່ຫໍສະພາປະຊາຊົນແຫ່ງຊາດຈີນນະຄອນຫຼວງປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານລີຊຽນລົງ ນາຍົກລັດຖະມົນຕີສິງກະໂປໃນໂອກາດເດີນທາງຢ້ຽມຢາມຈີນຢ່າງເປັນທາງການ.
ທ່ານສີຈິ້ນຜິງກ່າວວ່າ: ສອງຝ່າຍຄວນເພີ່ມທະວີການເຊື່ອມຈອດທາງຍຸດທະສາດແລະບຸກເບີກການພັດທະນາແລະປະດິດສ້າງຢ່າງບໍ່ຢຸດຢັ້ງທັງຜັນຂະຫຍາຍເນື້ອໃນການຮ່ວມມືໃຫ້ອຸດົມສົມບູນຂຶ້ນ ແລະລົງເລິກການຮ່ວມມືຮອບດ້ານ. ຂະນະດຽວກັນກໍຄວນສືບຕໍ່ເພີ່ມທະວີການແລກປ່ຽນດ້ານວັດທະນະທຳເພື່ອສືບທອດແລະເຊີດຊູມິດຕະພາບທີ່ມີມູນເຊື້ອລະຫວ່າງຈີນ-ສິງກະໂປໃຫ້ໄດ້ຮັບຜົນສຳເລັດຫຼາຍກວ່າເກົ່າ. ແນວໃດກໍດີ, ການກໍ່ສ້າງ "ໜຶ່ງແລວທາງໜຶ່ງເສັ້ນທາງ"ເປັນຈຸດໝາຍສຳຄັນຂອງການຮ່ວມມືລະຫວ່າງສອງປະເທດໃນປັດຈຸບັນເຊິ່ງຈາກນີ້ ຫວັງວ່າສອງຝ່າຍຈະສ້າງໂຄງການໂຕແບບການເຊື່ອມຈອດທາງຍຸດທະສາດຈຸ່ງກິ່ງຈີນ-ສິງກະໂປໃຫ້ໄດ້ຮັບຜົນງານທີ່ດີ ທັງຊຸກດັນປະເທດອື່ນໃນພາກພື້ນໃຫ້ເຂົ້າຮ່ວມການກໍ່ສ້າງແລວທາງໃໝ່ການຄ້າເທິງບົກແລະທາງທະເລສາກົນ.
ທ່ານລີຊຽນລົງຢືນຢັນວ່າ ສິງກະໂປຍຶດໝັ້ນນະໂຍບາຍປະເທດຈີນດຽວແລະຫວັງຈະຮັດແໜ້ນການຮ່ວມມືໃນບັນດາຂົງເຂດກັບຈີນໃຫ້ແໜ້ນແຟ້ນຍິ່ງຂຶ້ນ, ເພີ່ມທະວີການເຊື່ອມຈອດຍຸດທະສາດການພັດທະນາເພື່ອສ້າງຄວາມສົມບູນພູນສຸກໃຫ້ປະຊາຊົນສອງຊາດ. ສິງກະໂປສະໜັບສະໜູນການຮ່ວມສ້າງ "ໜຶ່ງແລວທາງໜຶ່ງເສັ້ນທາງ"ແລະສ້າງຕັ້ງທະນາຄານລົງທຶນພື້ນຖານໂຄງລ່າງອາຊີ ແລະຍິນດີເສີມຂະຫຍາຍສາຍພົວພັນຮ່ວມມືຈີນ-ອາຊຽນໃຫ້ກ້າວສູ່ລວງເລິກຢ່າງຕໍ່ເນື່ອງ.
ຜູ້ນຳທັງສອງປະເທດຍັງໄດ້ແລກປ່ຽນຄວາມເຫັນກ່ຽວກັບບັນຫາສາກົນແລະພາກພື້ນທີ່ສົນໃຈຮ່ວມກັນຕື່ມອີກ.
