ກອງປະຊຸມຂັ້ນລັດຖະມົນຕີການຮ່ວມມືເສດຖະກິດອະນຸພາກພື້ນແມ່ນ້ຳຂອງ ຫຼື GMS ຄັ້ງທີ 22 ໄດ້ຈັດຂຶ້ນຢູ່ນະຄອນຫຼວງຮ່າໂນ້ຍ ປະເທດຫວຽດນາມໃນວັນທີ 20 ກັນຍານີ້ ໂດຍເນັ້ນຫົວຂໍ້ "ເພີ່ມທະວີການຮ່ວມມືທີ່ແທ້ຈິງ, ຊຸກຍູ້ການຮ່ວມມື GMS ໃຫ້ໄດ້ຮັບຜົນຫຼາຍກວ່າເກົ່າອີກ". ໃນກອງປະຊຸມດັ່ງກ່າວ ນອກຈາກໄດ້ແຈ້ງຄວາມຄືບໜ້າຂອງການຮ່ວມມື GMS ໃນຂົງເຂດຕ່າງໆແລ້ວ ຍັງໄດ້ຄົ້ນຄວ້າພິຈາລະນາຂອບ "ແຜນການດຳເນີນງານຮ່າໂນ້ຍ", ຂອບການລົງທຶນພາກພື້ນ ກໍຄື ຜົນງານໃນຂົງເຂດຕ່າງໆ ເປັນຕົ້ນ ການທ່ອງທ່ຽວ ແລະ ຄົມມະນາຄົມ ແລະໄດ້ອອກຖະແຫຼງການຮ່ວມ.
ທ່ານສີຫົງສາຍ ຜູ້ຊ່ວຍລັດຖະມົນຕີກະຊວງການເງິນຈີນ ໄດ້ກ່າວປາໄສໃນກອງປະຊຸມ ໂດຍປິ່ນອ້ອມຂໍ້ລິເລິ່ມ "ໜຶ່ງແລວທາງໜຶ່ງເສັ້ນທາງ" ແລະມີຄຳຄິດເຫັນ 3 ຂໍ້ ຄື: ເສີມຂະຫຍາຍທ່າແຮງການຮ່ວມມືເສດຖະກິດ GMS, ຊຸກຍູ້ການເຊື່ອມຕໍ່ລະຫວ່າງ GMS ກັບກົນໄກຫຼາຍຝ່າຍອື່ນໆ ເປັນຕົ້ນ ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ແລະ ກົນໄກການຮ່ວມມືແມ່ນ້ຳລ້ານຊ້າງແມ່ນ້ຳຂອງ; ສ້າງຕາໜ່າງການເງິນພາກພື້ນ, ຮັບປະກັນການສະໜອງທຶນໃຫ້ແກ່ການພັດທະນາພາກພື້ນຢ່າງມີປະສິດທິຜົນ; ປະດິດສ້າງຮູບແບບການຮ່ວມມືດ້ານອຸດສາຫະກຳ ແລະຊຸກຍູ້ການຮ່ວມມືຍົກສູງຄວາມສາມາດການຜະລິດລະຫວ່າງປະເທດຕ່າງໆ.
ໃນກອງປະຊຸມດັ່ງກ່າວ ຍັງໄດ້ຈັດກອງປະຊຸມເວທີປຶກສາຫາລືແລວທາງເສດຖະກິດ GMS ຄັ້ງທີ 9 ໂດຍບັນດາຜູ້ແທນໄດ້ແລກປ່ຽນຄວາມເຫັນກ່ຽວກັບການເພີ່ມທະວີການເຊື່ອມຈອດແລວທາງເສດຖະກິດ GMS ແລະຫົວຂໍ້ອື່ນໆ.
