ວັນທີ 22 ກັນຍານີ້, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນແລະທ່ານແອນໂຕນິໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດໄດ້ຮ່ວມກັນເປັນສັກຂີພິຍານໃນພິທີລົງນາມໃນບົດບັນທຶກຄວາມເຂົ້າໃຈວ່າດ້ວຍຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ລະຫວ່າງກະຊວງການຕ່າງປະເທດສປຈີນແລະພະແນກວຽກງານເສດຖະກິດແລະສັງຄົມອົງການສະຫະປະຊາຊາດ.
ບົດບັນທຶກສະບັບນີ້ໄດ້ກວມເຖິງຫຼາຍຂົງເຂດເປັນຕົ້ນ ການຮ່ວມມືທີ່ແທ້ຈິງ, ການກໍ່ສ້າງຄວາມສາມາດ,ການແບ່ງປັນບົດຮຽນ,ການວິເຄາະນະໂຍບາຍແລະອື່ນໆ ເຊິ່ງມີຈຸດປະສົງເພື່ອສົ່ງເສີມໃຫ້ສອງຝ່າຍເພີ່ມທະວີການຮ່ວມມື, ຊ່ວຍປະເທດພວມພັດທະນາທີ່ຢູ່ລຽບຕາມ"ໜຶ່ງແລວທາງໜຶ່ງເສັ້ນທາງ"ເສີມສ້າງຄວາມສາມາດໃນການພັດທະນາ, ຊຸກຍູ້ການກໍ່ສ້າງ"ໜຶ່ງແລວທາງໜຶ່ງເສັ້ນທາງ"ແລະຜັນຂະຫຍາຍວາລະ2030ກ່ຽວກັບການພັດທະນາແບບຍືນຍືນ.
ທ່ານສີຈິ້ນຜິງ ປະທານປະເທດຈີນໄດ້ສະເໜີຂໍ້ລິເລີ່ມ"ໜຶ່ງແລວທາງໜຶ່ງເສັ້ນທາງ"ໃນປີ 2013 ເຊິ່ງໄດ້ຮັບການສະໜັບສະໜູນຈາກປະຊາຄົມໂລກຢ່າງກວ້າງຂວາງ. ເດືອນພຶດສະພາປີນີ້, ກອງປະຊຸມເວທີປຶກສາຫາລືຂັ້ນສູງການຮ່ວມມືສາກົນ"ໜຶ່ງແລວທາງໜຶ່ງເສັ້ນທາງ"ໄດ້ຈັດຂຶ້ນຢູ່ນະຄອນຫຼວງປັກກິ່ງ ສປ ຈີນໂດຍໄດ້ຮັບຜົນງານຢ່າງຫຼວງຫຼາຍ. ມາຮອດປັດຈຸບັນ, ຈີນໄດ້ເຊັນສັນຍາຮ່ວມມື"ໜຶ່ງແລວທາງໜຶ່ງເສັ້ນທາງ"ກັບ 74 ປະເທດແລະອົງການຈັດຕັ້ງສາກົນແລ້ວ.