ທີມແພດຈີນຊ່ວຍເຫຼືອປາກີສະຖານທີມທຳອິດໄດ້ເດີນທາງເຖິງທ່າກຳປັ່ນກວາດາປະເທດດັ່ງກ່າວໃນວັນທີ 22 ກັນຍານີ້ໂດຍພະນັກງານແພດ-ໝໍ 10 ກວ່າທ່ານຈະປະຕິບັດໜ້າທີ່ບໍລິການປິ່ນປົວໃຫ້ປະຊາຊົນທ້ອງຖິ່ນດັ່ງກ່າວເປັນເວລາ 2 ປີ.
ທີມແພດດັ່ງກ່າວໄດ້ຮັບການແຕ່ງຕັ້ງຮ່ວມຈາກຄະນະກຳມະການສາທາລະນະສຸກແລະແຜນການຄອບຄົວແຫ່ງຊາດຈີນແລະສະພາກາແດງຈີນ ເຊິ່ງປະກອບດ້ວຍພະນັກງານແພດ-ໝໍແລະພະນັກງານສະພາກາແດງຈີນ 12 ຄົນ. ໃນໄລຍະປະຕິບັດໜ້າທີ່ວຽກງານຢູ່ປາກິສະຖານ,ທີມແພດດັ່ງກ່າວຈະເຂົ້າປະຈຳການຢູ່ສູນປິ່ນປົວສຸກເສີນເອື້ອອາທອນຈີນປາກີສະຖານທີ່ຕັ້ງຢູ່ທ່າກຳປັ່ນກວາດາເພື່ອບໍລິການປິ່ນປົວປະຊາຊົນທ້ອງຖິ່ນ ທັງຝຶກອົບຮົມແລະຍົກລະດັບພະນັກງານແພດໝໍປາກີສະຖານອີກດ້ວຍ.
ວັນທີ 7 ພຶດສະພາຜ່ານມາ, ສູນປິ່ນປົວສຸກເສີນເອື້ອອາທອນຈີນປາກີສະຖານທີ່ກໍ່ສ້າງຂຶ້ນໂດຍໄດ້ຮັບທຶນຊ່ວຍເຫຼືອຈາກສະພາກາແດງຈີນນັ້ນໄດ້ເປີດບໍລິການຢູ່ທ່າກຳປັ່ນກວາດາ ທັງເປັນຫົວໜ່ວຍປີ່ນປົວສຸກເສີນແຫ່ງທຳອິດຕາມແລວທາງປີ່ນປົວສຸກເສີນຈີນ-ປາກີສະຖານ. ເພື່ອຮັບໃຊ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ", ສະພາກາແດງຈີນໄດ້ສ້າງຕັ້ງກອງທຶນເອື້ອອາທອນເສັ້ນທາງສາຍໄໝໂດຍສະເພາະໃນເດືອນກຸມພາປີນີ້ທັງປະກອບທຶນຊ່ວຍເຫຼືອການປະຕິບັດໂຄງການບໍລິການປະຊາຊົນປາກີສະຖານເປັນຕົ້ນ ແລວທາງປິ່ນປົວສຸກເສີນຈີນ-ປາກີສະຖານ,ໂຄງການຊ່ວຍເຫຼືອມະນຸດສະທຳ "ໜຶ່ງແລວທາງໜຶ່ງເສັ້ນທາງ"ແລະອື່ນໆ.