ວັນທີ 21 ກັນຍານີ້, ທ່ານວາງອີ້ ລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມການພົບປະລັດຖະມົນຕີການຕ່າງປະເທດຂອງປະເທດບຣິກສ໌ໃນໂອກາດເຂົ້າຮ່ວມກອງປະຊຸມສະມັດຊາໃຫຍ່ອົງການສະຫະປະຊາຊາດຢູ່ນິວຢອກ. ຂະນະທີ່ລັດຖະມົນຕີການຕ່າງປະເທດຂອງຣັດເຊຍ, ເບຼຊິນ, ອິນເດຍແລະອາຟລິກາໃຕ້ກໍເຂົ້າຮ່ວມການພົບປະຄັ້ງນີ້ເຊັ່ນດຽວກັນ.
ທ່ານວາງອີ້ກ່າວວ່າ, ກອງປະຊຸມພົບປະເຊ້ຍເມີນຂອງຜູ້ນຳປະເທດບຣິກສ໌ທີ່ໄດ້ອັດລົງເມື່ອບໍ່ດົນນີ້ໄດ້ຮັບຜົນສຳເລັດອັນຈົບງາມ, ໂດຍຜູ້ນຳ 5 ປະເທດໄດ້ສັງເກດຈາກລະດັບສູງຂອງຍຸດທະສາດແລະພາກສ່ວນທັງໝົດ, ຕົກລົງສ້າງການພົວພັນຄູ່ຮ່ວມຍຸດທະສາດບຣິກອັນສະໜິດແໜ້ນກວ່າເກົ່າ, ກວ້າງຂວາງກວ່າເກົ່າແລະຮອບດ້ານກວ່າເກົ່າ, ລົງເລິກການຮ່ວມມືທີ່ແທ້ຈິງໃນ 3 ດ້ານທີ່ເປັນເສົາຄ້ຳຄືເສດຖະກິດ, ການເມືອງແລະວັດທະທຳ, ຊຸກຍູ້ຮູບແບບການຮ່ວມມື " ບຣິກ+" , ເລີ່ມ "10 ປີສີຄຳ " ຮອບທີ 2 ຂອງການຮ່ວມມືບຣິກສ໌.
ທ່ານວາງອີ້ຊີ້ວ່າ, ປັດຈຸບັນ, ໜ້າທີ່ສຳຄັນທີ່ສຸດແມ່ນຈັດຕັ້ງປະຕິບັດຜົນການພົບປະເຊ້ຍເມີນແລະປ່ຽນຄວາມຮັບຮູ້ທີ່ເປັນເອກະພາບກັນທາງການເມືອງຂອງບັນດາຜູ້ນຳເປັນການປະຕິບັດງານທີ່ແທ້ຈິງ.
ລັດຖະມົນຕີການຕ່າງປະເທດຂອງປະເທດບຣິກສ໌ໄດ້ຊົມເຊີຍການພົບປະເຊ້ຍເມີນໄດ້ຮັບໝາກຜົນຢ່າງຫຼວງຫຼາຍແລະຊົມເຊີຍຈີນພະຍາຍາມເຮັດດວຽກໃນໄລຍະເປັນປະເທດປະທານໝູນວຽນ. ຂະນະດຽວກັນ, ບັນດາລັດຖະມົນຕີການຕ່າງປະເທດກໍເນັ້ນວ່າຈະລົງເລິກການຮ່ວມມືໃນບັນດາຂົງເຂດຕື່ມອີກ, ເພີ່ມທະວີການປະສານງານກັບຕະຫຼາດທີ່ຈະເລີນໃໝ່ແລະປະເທດທີ່ພວມພັດທະນາອື່ນໆ, ປະກອບສ່ວນເຂົ້າໃນການຮັກສາສັນຕິພາບຂອງໂລກແລະຊຸກຍູ້ການພັດທະນາຮ່ວມກັນໃຫ້ໄດ້ຫຼາຍກວ່າເກົ່າ. ພ້ອມກັນນັ້ນ, ບັນດາລັດຖະມົນຕີການຕ່າງປະເທດກໍຫວັງວ່າການພົບປະຢູ່ອາຟລິກາໃຕ້ໃນປີໜ້າຈະໄດ້ຮັບຜົນສຳເລັດ.
