ວັນທີ 22 ກັນຍານີ້, ທຳນຽບຂາວອາເມລິກາໄດ້ຖະແຫຼງບົດບັນທຶກຂໍ້ຄວາມສຳຄັນຂອງການພົບປະລະຫວ່າງທ່ານໂດນັນ ທຣຳ ປະທານາທິບໍດີອາມເລິກາແລະທ່ານມູນເຈອິນ ປະທານາທິບໍດີສ.ເກົາຫຼີຢູ່ນິວຢອກໃນວັນທີ 21 ກັນຍານີ້ໂດຍລະບຸວ່າ, ສອງຝ່າຍໄດ້ກ່າວລື້ມເປົ້າໝາຍຂອງສອງປະເທດທີ່ໃຊ້ຮູບແບບສັນຕິວິທີເພື່ອຊຸກຍູ້ໃຫ້ສປປເກົາຫຼີປະລະອາວຸດນິວເຄຼຍ.
ບົດບັນທຶກດັ່ງກ່າວລະບຸວ່າ, ທ່ານທຣຳແລະທ່ານມູນເຈອິນ " ກ່າວລື້ມວ່າເປົ້າໝາຍຮ່ວມຂອງສອງປະເທດແມ່ນການໃຊ້ຮູບແບບສັນຕິວິທີຊຸກຍູ້ໃຫ້ສປປເກົາຫຼີປະລະນິວເຄຼຍຢ່າງຮອບດ້ານ, ຕິດຕາມກວດກາໄດ້ແລະຕ່າວປີ້ນຄືນບໍ່ໄດ້". ສອງຝ່າຍເຫັນວ່າ, ເພື່ອສະກັດກັ້ນບໍ່ໃຫ້ສປປເກົາຫຼີສືບຕໍ່ນຳໃຊ້ການກະທຳເປັນການຂົ່ມຂູ່ແລະຊຸກຍູ້ໃຫ້ສປປເກົາຫຼີປະລະນິວເຄຼຍ, " ການທີ່ໃຊ້ຄວາມກົດດັນແລະຂວ້ຳບາດສປປເກົາຫຼີໃນລະດັບສູງສຸດ " ແມ່ນວີທີທີ່ມີຄວາມຈຳເປັນ.
ວັນທີ 22 ກັນຍານີ້, ທ່ານລູ້ຄ່າງ ໂຄສົກກະຊວງການຕ່າງປະເທດຈີນໄດ້ຕອບຄຳຖາມຂອງນັກຂ່າວໃນພິທີຖະແຫຼງຂ່າວວ່າ, ປັດຈຸບັນ, ສະຖານະການຢູ່ແຫຼມເກົາຫຼີແມ່ນສັບສົນແລະຂ້ຽວຂາດທີ່ສຸດ. ບັນດາຝ່າຍກ່ຽວຂ້ອງຄວນຮັກສາການອົດກັ້ນແລະພະຍາຍາມເຮັດໃຫ້ສະຖານະການຜ່ອນຄາຍລົງ.
ວັນທີ 3 ກັນຍານີ້, ສປປເກົາຫຼີບໍ່ຫົວຊາຕໍ່ການຄັດຄ້ານໂດຍທົ່ວໄປຂອງປະຊາຄົມໂລກແລະດຳເນີນການທົດລອງນິວເຄຼຍເທື່ອທີ 6 . ຈາກນັ້ນ, ວັນທີ 11 , ເດືອນດຽວກັນ, ສະພາຄວາມໝັ້ນຄົງສະຫະປະຊາຊາດໄດ້ເປັນເອກະສັນກັນຜ່ານມະຕິເລກທີ 2375 ໂດຍຕົກລົງຂວ້ຳບາດສປປເກົາຫຼີອີກຄັ້ງໃໝ່, ຂະນະດຽວກັນ, ມະຕິດັ່ງຂ່າວກໍ່ກ່າວລື້ມການຮັກສາສັນຕິພາບແລະສະຖຽນລະພາບຢູ່ແຫຼມເກົາຫຼີແລະອາຊີຕາເວັນອອກສຽງເໜືອ, ທັງຮຽກຮ້ອງໃຫ້ແກ້ໄຂບັນຫາໂດຍສັນຕິໂດຍຜ່ານຊ່ອງທາງການຕ່າງປະເທດແລະການເມືອງ.
