ການຂີ່ລົດຖີບໄປຊີ່ຈ້າງ(ຕິເບດ)ບໍ່ຢູ່ໃນຫົວຂອງຫຼາຍຄົນອີກແລ້ວ, ແຕ່ຢູ່ເມືອງຊີ່ອ່ານ ແຂວງຊ້ານຊີ່, ພໍ່ເຖົ້າກ່າວຕຸ່ງໄລ ທີ່ປີນີ້ອາຍຸ 65 ປີ ພັດກ້າຄິດກ້າເຮັດທັນທີທັນໃດໂດຍເພິ່ນໄດ້ອອກເດີນທາງຈາກເມືອງຊີ່ອ່ານໃນວັນທີ 18 ສິງຫາຜ່ານມາແລະໃຊ້ເວລາ 33 ວັນຄືມາເຖິງວັນທີ 19 ກັນຍານີ້ຈິ່ງເດີນທາງເຖິງເມືອງລາຊາ ເຂດປົກຄອງຕົນເອງຊີ່ຈ້າງ(ຕິເບດ).
ກ່ອນບຳນານ, ທ່ານກ່າວຕຸ່ງໄລເປັນກຳມະກອນທາງລົດໄຟແລະຜ່ານມາລາວເຄີຍເວົ້ານຳຫຼາຍຄົນວ່າ ຢາກໄປຊີ່ຈ້າງ(ຕິເບດ)ດ້ວຍການຂີ່ລົດຖີບ ແຕ່ທຸກຄົນໃນຄອບຄົວ ບໍ່ເຫັນດີເຊິ່ງດ້ານໜຶ່ງຍ້ອນອາຍຸສູງແລ້ວແລະອີກດ້ານໜຶ່ງຍ້ອນໄກແສນໄກທັງມີຫຼາຍປັດໄຈທີ່ບໍ່ແນ່ນອນ, ແຕ່ໃນທີ່ສຸດແລ້ວກໍບໍ່ມີໃຜສາມາດຫ້າມພໍ່ເຖົ້າໃຈເດັດຄົນນີ້ໄດ້. ເຖິງວ່າບໍ່ມີອຸປະກອນເດີນທາງດ້ວຍລົດຖີບທັງບໍ່ມີເພື່ອນຮ່ວມທາງ, ແຕ່ເພິ່ນກໍຕັດສິນໃຈເອົາພຽງແຕ່ຊຸດກຳມະກອນທາງລົດໄຟ 2 ໂຕແລະລົດຖີບທີ່ຊື້ໃນລາຄາ 1000 ກວ່າຢວນ, ທ່ານ ກໍໄດ້ອອກເດີນທາງທັນທີ. ດ້ວຍເຫດຜົນໃດຈິ່ງຂີ່ລົດຖີບໄປຊີ່ຈ້າງ(ຕິເບດ), ທ່ານບອກວ່າ: ທຳອິດກໍພຽງແຕ່ຢາກລອງເບິ່ງ, ແຕ່ບໍ່ນຶກເລີຍວ່າຕົນຈະມີຄວາມອົດທົນຂີ່ໄປຈົນເຖິງຈຸດໝາຍປາຍທາງໄດ້, ການເຮັດໄດ້ແນວນີ້ນອກຈາກມີມານະຈິດອົດທົນແລ້ວກໍຕ້ອງມີສຸຂະພາບເຂັ້ມແຂງຕື່ມອີກ.