ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດ ໄດ້ອອກຖະແຫຼງການຜ່ານໂຄສົກຂອງຕົນ ໃນວັນທີ 25 ກັນຍານີ້ ໂດຍສະແດງຄວາມເປັນຫ່ວງຕໍ່ການລົງປະຊາມະຕິແຍກເປັນເອກະລາດຂອງເຂດເຄິດສະຖານ ປະເທດອີຣັກ ໃນວັນດັ່ງກ່າວນັ້ນວ່າ ອາດຈະພາໃຫ້ເກີດຄວາມວຸ້ຍວາຍໄດ້.
ຖະແຫຼງການລະບຸວ່າ: ທ່ານກູເຕີເຣັສ ເຄົາລົບຕໍ່ອະທິປະໄຕ, ຜືນແຜ່ນດິນອັນຄົບຖ້ວນ ແລະ ຄວາມສາມັກຄີຂອງອີຣັກ ທັງເຫັນວ່າ ບັນຫາທີ່ຍັງຄົງຄ້າງລະຫວ່າງລັດຖະບານອີຣັກ ແລະ ອຳນາດການປົກຄອງເຂດເຄິດສະຖານ ຄວນແກ້ໄຂໂດຍການສົນທະນາ ແລະ ຜ່ອນຜັນສັ້ນຍາວກັນຢ່າງສ້າງສັນ.
ທັງນີ້ ວັນທີ 25 ກັນຍານີ້, ເຂດປົກຄອງຕົນເອງເຄິດສະຖານ ປະເທດອີຣັກ ໄດ້ລົງປະຊາມະຕິເພື່ອແຍກເປັນເອກະລາດ, ແຕ່ກໍຖືກລັດຖະບານອີຣັກ ລວມທັງປະເທດອ້ອມຂ້າງ ເປັນຕົ້ນ ຕວກກີ ແລະ ອີຣານ ຄັດຄ້ານຢ່າງຮຸນແຮງ, ຂະນະທີ່ອາເມລິກາ ແລະ ສະຫະພາບເອີຣົບ ກໍສະແດງທ່າທີສະໜັບສະໜູນໃນຄວາມເປັນເອກະພາບຂອງອີຣັກ.