ສູນວັດທະນະທໍາຈີນປະຈໍາລາວ, ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ສປປ ລາວ ແລະ ພະແນກວັດທະນະທໍາແຂວງຫູເປີຍ ສປ ຈີນ ໄດ້ເປັນເຈົ້າພາບຈັດງານສະແດງສິລະປະຫູເປີຍ ສະເຫຼີມສະຫຼອງບຸນໄຫວ້ພະຈັນ ແລະ ເພື່ອຊາວນະຄອນຫຼວງວຽງຈັນໄດ້ສໍາຜັດກິ່ນອາຍແລະມົນສະເໜ່ຂອງແຂວງຢຸນໜານ ໃນຄໍ່າຄືນວັນທີ 25 ກັນຍາ 2017ນີ້ ທີ່ຫໍວັດທະນະທໍາແຫ່ງຊາດນະຄອນຫຼວງວຽງຈັນ ໂດຍທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ຫວາງສີຫຸ່ຍ ທີ່ປຶກສາການຄ້າສະຖານທູດຈີນ ປະຈໍາ ສປປ ລາວ, ທ່ານ ນາງ ຕິ່ງຊິ່ງ ຫົວໜ້າສູນວັດທະນະທໍາຈີນປະຈຳລາວ, ພະນັກງານສະຖານທູດຈີນປະຈໍາລາວ, ທູຕານຸທູດປະຈໍາສປປ ລາວ, ພາກສ່ວນກ່ຽວຂ້ອງ ພ້ອມດ້ວຍມວນຊົນລາວເຊື້ອສາຍຈີນແລະມວນຊົນນະຄອນຫຼວງວຽງຈັນເຂົ້າຮ່ວມ.
ລາຍການທີ່ສິລະປະແຂວງຫູເປີຍ ສປ ຈີນ ສະແດງພາຍໃຕ້ຫົວຂໍ້: " ມອບບົດກະວີໃຫ້ພະຈັນ " ໄດ້ສ້າງຄວາມປະທັບໃຈ ແລະ ໄດ້ຮັບສຽງຕົບມືຊົມເຊີຍຈາກມວນຊົນຕະຫຼອດເວລາ. ພາຍຫຼັງສຳເລັດການສະແດງ, ທ່ານ ບົວເງິນ ຊາພູວົງ ຮອງລັດຖະມົນຕີກະຊວງ ຖວທ ໄດ້ຕີລາຄາວ່າ: ທຸກລາຍການເປັນການສະແດງທີ່ດີເລີດເຮັດໃຫ້ຜູ້ຊົມທີ່ກໍາລັງມ່ວນໆນັ້ນພັດມີອັນໃໝ່ມາອີກແລະເດັ່ນຂຶ້ນກວ່າເກົ່າ, ເປັນສິລະປະທີ່ໜ້າເບິ່ງໜ້າຊົມແລະລະດັບການສະແດງກໍເກັ່ງຫຼາຍ. ບໍ່ວ່າຈະເປັນລາຍການສະແດງກາຍະສິນ, ຟ້ອນ, ການບັນເລງດົນຕີ, ຮ້ອງເພງ, ຟ້ອນກັງຟູ, ມາຍາກົນ ອຸດົມສົມບູນຫຼາຍແລະມີຫຼາຍສັດທະສົດ, ມີຫຼາຍສິ່ງຫຼາຍຢ່າງເຮັດໃຫ້ຜູ້ຊົມຕື່ນເຕັ້ນ ຕະຫຼອດ. ສ້າງຄວາມປະທັບໃຈແລະຮຽກໄດ້ສຽງຕົບມື, ສຽງຮ້ອງໂຮຂອງຜູ້ຊົມຮູ້ສຶກວ່າຟົດຟື້ນເປັນພິເສດ ເຊິ່ງເປັນການສະແດງເຖິງສິລະປະທີ່ມີບັນຍາກາດໃໝ່ທີ່ມີຄວາມງາມ ຄວາມມ່ວນຊື່ນ ແລະ ອັນສໍາຄັນແມ່ນຄວາມສາມັກຄີມິດຕະພາບການຮ່ວມມືລະຫວ່າງສອງພັກສອງລັດແລະປະຊາຊົນສອງຊາດນັບມື້ນັບກ້າວເຂົ້າສູ່ລວງເລິກ ເຮັດໃຫ້ການໄປມາຫາສູ່ແລະການສ້າງຊີວິດການເປັນຢູ່ສອງປະເທດນັບມື້ນັບດີຂຶ້ນ.ບຸນໄຫວ້ພະຈັນຈະກົງກັບ 15 ຄໍ່າເດືອນ 8 ຂອງທຸກໆປີ ຕາມປະຕິທິນຈັນທະຄະຕິຂອງຈີນ ແລະ ເປັນໜຶ່ງໃນບຸນປະເພນີທີ່ສໍາຄັນທີ່ສຸດຂອງຊາວຈີນ ເຊິ່ງປີນີ້ກົງກັບວັນທີ 4 ຕຸລາ 2017. ສຳລັບຄໍ່າຄືນບຸນໄຫວ້ພະຈັນຢູ່ຈີນນັ້ນ, ທຸກຄົນໃນຄອບຄົວຈະພ້ອມກັນຮ່ວມພາເຂົ້າຊຸມແຊວ, ກິນຂະໜົມໄຫວ້ພະຈັນຮ່ວມກັນ ແລະ ນັ່ງເບິ່ງດວງຈັນທີ່ສະຫວ່າງສະໄຫວທົ່ວທ້ອງຟ້າ. ບຸນໄຫວ້ພະຈັນໝາຍເຖິງຄວາມສາມັກຄີກົມກຽວ ແລະນີ້ກໍເປັນເປົ້າໝາຍສູງສຸດທາງແນວຄິດຂອງຊາວຈີນ.
