ງານພົບປະຫາລືບັນຫາສັງຄົມແລະວັດທະນະທຳຈີນ-ອາເມລິກາເທື່ອທຳອິດໄດ້ຈັດຂຶ້ນຢູ່ນະຄອນຫຼວງວໍຊິງຕັນສະຫະລັດອາເມລິກາໃນວັນທີ 28 ກັນຍານີ້, ໂດຍທ່ານນາງຫຼິວຢຽນຕຸ່ງແລະທ່ານເຣກສ໌ ຕີວເລີຊັນ ລັດຖະມົນຕີການຕ່າງປະເທດອາເມລິກາເປັນປະທານຮ່ວມ.
ທ່ານນາງຫຼິວຢຽນຕຸ່ງກ່າວວ່າ, ສອງຝ່າຍຄວນເຮັດໃຫ້ການຫາລືຄັ້ງນີ້ບັນລຸຜົນຕົວຈິງດີ, ຊຸກຍູ້ໃຫ້ການຮ່ວມມືດ້ານການສຶກສາປະສົບຜົນສຳເລັດໃໝ່ຢ່າງບໍ່ຢຸດຢັ້ງ, ເສີມຂະຫຍາຍບົດບາດຂອງກົນໄກຄະນະກຳມະການຮ່ວມມືວິທະຍາສາດເຕັກນິກຈີນ-ອາເມລິກາແລະງານພົບປະຫາລືບັນຫາປະດິດສ້າງໃໝ່ໃຫ້ດີ, ເພີ່ມທະວີການຮ່ວມມືໃນຂະແໜງການສິລະປະ, ຫໍພິພິທະພັນແລະສິລະປະວັດທະນະທຳແລະອື່ນໆ, ຊຸກຍູ້ໃຫ້ຂະແໜງການປິ່ນປົວແລະສາທາລະນະສຸກຂອງສອງຝ່າຍສ້າງສາຍພົວພັນຄູ່ຮ່ວມມື. ຂະນະທີ່ການເພີ່ມທະວີການຮ່ວມມືໃນຂົງເຂດຊາວໜຸ່ມແລະແມ່ຍິງ, ຄວນຊ່ວຍສ້າງວຽກເຮັດງານທຳ, ການປະດິດສ້າງໃໝ່ແລະປົກປ້ອງສິດຜົນປະໂຫຍດແລະອື່ນໆໃຫ້ຫຼາຍກວ່າເກົ່າ.
ທ່ານ ຕີວເລີຊັນ ກ່າວວ່າ, ອາເມລິກາເອົາໃຈໃສ່ສູງຕໍ່ການແລກປ່ຽນວັດທະນະທຳກັບຈີນ, ແລະຍິນດີຮ່ວມກັບຈີນເສີມຂະຫຍາຍບົດບາດຂອງງານພົບປະຫາລືຄັ້ງນີ້ໃຫ້ດີແລະບັນລຸຕາມເປົ້າໝາຍທີ່ວາງໄວ້.
 |
