ຫວ່າງມໍ່ໆນີ້ ເພື່ອເປັນການຕ້ອນຮັບກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນ, ງານວາງສະແດງຂະໜາດໃຫຍ່ທີ່ໃສ່ຊື່ວ່າ "5 ປີທີ່ເຕັມໄປດ້ວຍຄວາມກ້າວໜ້າ"ໄດ້ໄຂຂຶ້ນຢູ່ຫໍວາງສະແດງປັກກິ່ງ ເຊິ່ງງານວາງສະແດງຄັ້ງນີ້ໄດ້ວາງສະແດງ ແລະໂຄສະນາກ່ຽວກັບການປະຕິຮູບແລະຜົນງານອັນຮຸ່ງເຮືອງທີ່ຈີນໄດ້ຮັບໃນດ້ານການເມືອງ, ເສດຖະກິດ, ວັດທະນະທຳ, ສັງຄົມ, ສີວິໄລດ້ານຊີວະພາບ ແລະການຕ່າງປະເທດເປັນຕົ້ນນັບແຕ່ການໄຂກອງປະຊຸມຜູ້ແທນທົ່ວປະເທດຄັ້ງທີ 18 ຂອງພັກເປັນຕົ້ນມາ. ໃນງານວາງສະແດງຄັ້ງນີ້ມີຈຸດເດັ່ນແນວໃດ? ຕໍ່ໄປມາຟັງການລາຍງານອັນລະອຽດ.
ວັນທີ 26 ກັນຍານີ້ແມ່ນມື້ທຳອິດທີ່ງານວາງສະແດງດັ່ງກ່າວເປີດປະຕູສູ່ມວນຊົນ, ປະຊາຊົນຢ່າງຫຼວງຫຼາຍໄດ້ເຂົ້າໄປຊົມການສະແດງ ໄດ້ຮູ້ກັບຜົນງານການພັດທະນາຂອງຈີນໃນທຸກດ້ານຕະຫຼອດໄລຍະ 5 ປີທີ່ຜ່ານມາໂດຍຜ່ານຈາກຕົວຢ່າງ, ເອກະສານແລະຮູບພາບຕ່າງໆ.
ຢູ່ເຂດວາງສະແດງທີ່ຕັ້ງຫົວຂໍ້ວ່າ "ຖືປະຊາຊົນເປັນໃຈກາງ ໃຫ້ປະຊາຊົນມີຄວາມຮູ້ສຶກເພິ່ງພໍໃຈ", ນາງຈ່າງລີ້ຊິນ ນັກສຶກສາປະລິນຍາໂທຂອງມະຫາວິທະຍາໄລວິທະຍາສາດເຕັກນິກຂອງປັກກິ່ງມີຄວາມສົນໃຈຢ່າງສູງຕໍ່ຫ້ອງຮຽນແບບສະມາດ ໂດຍໄດ້ນຳໃຊ້ລະບົບສຶກສາທີ່ຄວບຄຸມທາງໄກເຮັດໃຫ້ໂຮງຮຽນທີ່ຢູ່ນະຄອນຫຼວງປັກກິ່ງກັບໂຮງຮຽນທີ່ຢູ່ເຂດຊິ່ນຈ່ຽງ ແລະແຂວງຢຸນນານຂອງຈີນສາມາດຕິດຕໍ່ພົວພັນກັນ, ເຮັດໃຫ້ເດັກນ້ອຍທີ່ຢູ່ບ່ອນຫ່າງໄກສອກຫຼີກກໍ່ສາມາດຊົມໃຊ້ເຖິງຊັບພະຍາກອນການສຶກສາທີ່ດີຈາກນະຄອນຫຼວງ,ເຮັດໃຫ້ວິທະຍາສາດເຕັກນິກຮັບໃຊ້ການສຶກສາໃຫ້ເປັນທັນສະໄໝ. ນາງຈ່າງລີຊິນກ່າວວ່າ, ໃນ 5ປີທີ່ຜ່ານມາ ອິນເຕີເນັດຂອງຈີນພັດທະນາຢ່າງວ່ອງໄວເຮັດໃຫ້ເພິ່ນເອງກໍ່ກາຍເປັນຜູ້ທີ່ໄດ້ຮັບຜົນປະໂຫຍດຈາກການສຶກສາທາງໄກ.
ຢູ່ເຂດວາງສະແດງທີ່ມີຫົວເລື່ອງວ່າ: ການສ້າງສາຈີນທີ່ແຂງແຮງ, ລຸງປາຍຊີກວງ ຄູສອນຜູ້ທີ່ອອກບຳນານທີ່ອາຍຸ 78 ປີຊີ້ອອກວ່າ, ການປະຕິຮູບລະບົບການປິ່ນປົວພະຍາດເຮັດໃຫ້ລາຍຈ່າຍດ້ານສາທາລະນະສຸກຂອງສ່ວນບຸກຄົນຫຼຸດໜ້ອຍລົງ, ລຸງບອກວ່າ ດຽວນີ້ ເພິ່ນສົນໃຈນຳການປິ່ນປົວພະຍາດຫຼາຍ ເຊິ່ງເຫັນວ່າ ໃນ 5 ປີທີ່ຜ່ານມາ ຄ່າໃຊ້ຈ່າຍດ້ານການປິ່ນປົວພະຍາດຂອງເພິ່ນເອງແມ່ນໄດ້ຫຼຸດໜ້ອຍລົງເລື້ອຍໆ.
ລຸງບອກວ່າ: "ການໄປກວດພະຍາດບໍ່ມີບັນຫາແລ້ວ, ດຽວນີ້ແມ່ນມີການປະກັນໄພປິ່ນປົວພະຍາດ, ເຊັ່ນວ່າຢູ່ໃນບັດປະກັນໄພປິ່ນປົວພະຍາດມີ 1 ພັນຢວນ, ບັດໃຊ້ໝົດແລ້ວ ຍັງຊິເພີ່ມໃຫ້, ຕົນເອງພຽງແຕ່ຈ່າວ 5% ຂອງຄ່າປິ່ນປົວທໍ່ນັ້ນ, ສະນັ້ນ ຮູ້ສຶກວ່າ ຊີວິດການເປັນຢູ່ດີຂຶ້ນ."
ບໍ່ພຽງແຕ່ການສຶກສາແລະການປິ່ນປົວພະຍາດທໍ່ນັ້ນ, ໃນ 5 ປີທີ່ຜ່ານມາ, ຜົນງານທີ່ໄດ້ຮັບໃນຂົງເຂດຕ່າງໆຂອງຊີວິດການເປັນຢູ່ຂອງປະຊາຊົນຈີນຍັງສະແດງໃຫ້ເຫັນໃນດ້ານລາຍໄດ້ເພີ່ມຂຶ້ນ, ບຳບັດຄວາມທຸກຍາກ, ແລະການຢູ່ແບບນະໂຍບາຍ ແລະດ້ານອື່ນໆອີກດ້ວຍ.
ໃນບັນດາປະຊາຊົນຜູ້ທີ່ໄປຊົມການວາງສະແດງ ຍັງມີຄົນຕ່າງປະເທດບໍ່ໜ້ອຍ. ທ່ານລຸກ ຄົນການາດາທີ່ເຮັດວຽກຢູ່ນະຄອນຊຽງໄຮ້ໄດ້ໄປຊົມງານວາງສະແດງຄັ້ງນີ້ໃນໂອກາດທີ່ໄປການຢູ່ປັກກິ່ງ. ຢູ່ເຂດວາງສະແດງກ່ຽວກັບຜົນງານການຕ່າງປະເທດ, ທ່ານລຸກໄດ້ຊີ້ໃສ່ແຜ່ນຮູບທີ່ກ່າວເຖິງຄວາມຝັນຂອງຈີນ, ແລ້ວບອກນັກຂ່າວດ້ວຍພາສາຈີນທີ່ລຽນໄຫຼວ່າ:
ຂ້າພະເຈົ້າໄດ້ອ່ານການອະທິບາຍກ່ຽວກັບຄວາມຝັນຂອງຈີນທີ່ສະເໜີອອກໂດຍທ່ານສີຈິ້ນຜິງ ເຫັນວ່າ ຄວາມຝັນແບບນີ້ກໍ່ຄືຄວາມຝັນຂອງປະຊາຊົນໝົດທຸກຄົນຂອງໂລກ ເຊິ່ງສະແຫວງຫາສັນຕິພາບ, ຄວາມສຸກ ແລະການຮ່ວມມື.
ຈາກຊີວິດການເປັນຢູ່ຮອດການຕ່າງປະເທດ, ຈາກເສດຖະກິດຮອດການປົກຄອງປະເທດດ້ວຍກົດໝາຍ, ຮູບພາບ, ວິດີໂອ, ຕົວຢ່າງທີ່ລະອຽດຕ່າງໆບໍ່ພຽງແຕ່ໄດ້ສະແດງໃຫ້ເຫັນການພັດທະນາພາສາລະກິດຂອງພັກແລະລັດຖະບານໃນ 5 ປີມານີ້, ຍັງເຮັດໃຫ້ປະຊາຊົນມີຄວາມຕື່ນເຕັ້ນທີ່ສຸດ. ຢູ່ເຂດທີ່ປະກອບຄຳເຫັນ, ໄດ້ເຫັນປະຊາຊົນຜູ້ທີ່ໄປຊົມການວາງສະແດງນັ້ນກຳລັງລຽນແຖວກັນລໍຖ້າຂຽນຄຳເຫັນຂອງຕົນເອງ, ເວລາບໍ່ຮອດມື້ໜຶ່ງກໍ່ໄດ້ຮັບຄຳເຫັນຫຼາຍພັນຂໍ້, ຄົນທັງຫຼາຍພາກັນສະແດງຄວາມພາກພູມໃຈຕໍ່ປະເທດຊາດຂອງຕົນເອງ.