ສື່ມວນຊົນອີຣັກລາຍງານໃນວັນທີ 29 ກັນຍານີ້ວ່າ, ຄຳສັ່ງຂອງລັດຖະບານປະເທດຕົນທີ່ຫ້າມຖ້ຽວບິນສາກົນໄປກັບເຂດປົກຄອງຕົນເອງເຄີດິສຖານນັ້ນ ໄດ້ມີຜົນບັງຄັບໃຊ້ຢ່າງເປັນທາງການໃນເວລາ 18 ໂມງຂອງວັນທີ 29 ກັນຍານີ້.
ເຈົ້າໜ້າທີ່ສະໜາມບິນສາກົນແອປີເລີເຂດເຄີດິສຖານທ່ານໜຶ່ງ ກ່າວວ່າ, ຖ້ຽວບິນສາກົນທີ່ໄປກັບສະໜາມບິນດັ່ງກ່າວ ໄດ້ຢຸດການບໍລິການແລ້ວ, ແຕ່ໃນປັດຈຸບັນ, ເຫຼືອແຕ່ຖ້ຽວບິນພາຍໃນທີ່ໄປກັບນະຄອນຫຼວງແບັກແດັດ ຍັງສືບຕໍ່ບໍລິການ, ຂະນະດຽວກັນ, ຖ້ຽວບິນສາກົນໄປກັບສະໜາມບິນຊູເລມານີຢາຂອງເຂດເຄີດິສຖານນັ້ນ ກໍໄດ້ຢຸດການບໍລິການແລ້ວເຊັ່ນດຽວກັນ.
ວັນທີ 25 ກັນຍານີ້, ເຂດເຄີດິສຖານ ໄດ້ຈັດການລົງປະຊາມະຕິແຍກເປັນເອກະລາດຈາກອີຣັກໂດຍບໍ່ສົນໃຈການຄັດຄ້ານຂອງລັດຖະບານກາງແລະຝ່າຍອື່ນໆຂອງປະເທດດັ່ງກ່າວ ແລະເພື່ອເປັນການຕອບໂຕ້, ໃນວັນທີ 26 ກັນຍານີ້, ລັດຖະບານອີຣັກໄດ້ຮຽກຮ້ອງໃຫ້ເຂດດັ່ງກ່າວມອບສະໜາມບິນສາກົນທີ່ຕັ້ງຢູ່ໃຫ້ລັດຖະບານກາງຄຸ້ມຄອງພາຍໃນ 3 ມື້, ຖ້າບໍ່ດັ່ງນັ້ນ, ກໍຈະຫ້າມຖ້ຽວບິນສາກົນໄປກັບເຂດດັ່ງກ່າວຢຸດບໍລິການ.