ວັນທີ 30 ກັນຍາຜ່ານມາ ທ່ານບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ແຫ່ງ ສປປ ລາວ, ທ່ານທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ແລະທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ແຫ່ງ ສປປ ລາວໄດ້ສົ່ງໂທລະເລກອວຍພອນວັນສ້າງຕັ້ງ ສປ ຈີນຄົບຮອບ 68 ປີ ໄປຍັງທ່ານສີຈີ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດ ແຫ່ງ ສປ ຈີນ, ທ່ານລີເຄີ້ສຽງ ນາຍົກລັດຖະມົນຕີ ແຫ່ງ ສປ ຈີນ ແລະທ່ານຈ່າງເຕີຈ່ຽງ ປະທາ ສະພາປະຊາຊົນແຫ່ງຊາດ ຈີນ ໂດຍເນືອໃນລະອຽດຂອງໂທລະເລກອວຍພອນຄືດັ່ງນີ້:
ບັນດາສະຫາຍທີ່ຮັກແພງ, ເນື່ອງໃນໂອກາດວັນສະຖາປະນາ ສາທາລະນະລັດປະຊາຊົນຈີນຄົບຮອບ 68 ປີ, ໃນນາມຄະນະບໍລິຫານງານສູນກາງພັກປະຊາຊົນປະຕິວັດລາວ, ລັດຖະບານ, ສະພາແຫ່ງຊາດ ແຫ່ງ ສາທາລະນະລັດປະຊາທິປະໄຕປະຊາຊົນລາວ ແລະປະຊາຊົນລາວບັນດາເຜົ່າ ກໍຄືໃນນາມສ່ວນຕົວ, ພວກຂ້າພະເຈົ້າ ຂໍສົ່ງຄຳຊົມເຊີຍອັນອົບອຸ່ນ ແລະພອນໄຊອັນປະເສີດ ມາຍັງບັນດາສະຫາຍ ໂດຍຜ່ານບັນດາສະຫາຍໄປຍັງ ຄະນະກຳມະການສູນກາງພັກກອມມູນິດຈີນ, ລັດຖະບານ , ສະພາປະຊາຊົນແຫ່ງຊາດ ແຫ່ງສາທາລະນະລັດ ປະຊາຊົນຈີນ ແລະປະຊາຊົນທຸກຖ້ວນໜ້າ.
ພວກຂ້າພະເຈົ້າມີຄວາມປິຕິຊົມຊື່ນເປັນຢ່າງຍິ່ງທີ່ເຫັນວ່າ ຕະຫຼອດໄລຍະ 68 ປີ ທີ່ຜ່ານມາ, ພາຍໃຕ້ການຊີ້ນຳ-ນຳພາອັນສະຫຼາດສ່ອງໃສຂອງພັກກອມມູນິດຈີນ, ປະຊາຊົນຈີນອ້າຍນ້ອງ ສາມາດຍາດມາໄດ້ຜົນສຳເລັດອັນໃຫຍ່ຫຼວງຮອບດ້ານ ໃນການສ້າງສັງຄົມນິຍົມຕາມສີສັນສະເພາະຂອງຈີນ ເຊິ່ງເຮັດໃຫ້ສາທາລະນະລັດປະຊາຊົນຈີນມີຄວາມກ້າວໜ້າໃນດ້ານວິທະຍາສາດ-ເຕັກໂນໂລຊີ ທີ່ທັນສະໄໝ, ປະເທດຊາດໄດ້ຮັບການພັດທະນາຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນຈີນດີຂຶ້ນເປັນກ້າວໆ, ຖານະບົດບາດຂອງ ສປ ຈີນ ໄດ້ສູງເດັ່ນຂຶ້ນຢ່າງບໍ່ຢຸດຢັ້ງໃນເວທີພາກພື້ນ ແລະສາກົນ, ເຮັດໃຫ້ການເດີນຕາມເສັ້ນທາງສັງຄົມນິຍົມ ທີ່ມີພັກກອມມູນິດຈີນເປັນແກນນຳ ນັບມື້ນັບສະຫງ່າຜ່າເຜີຍ ແລະເດັ່ນຊັດຂຶ້ນຢ່າງບໍ່ຢຸດຢັ້ງ, ສປ ຈີນ ໄດ້ກາຍເປັນແບບຢ່າງທີ່ດີໃຫ້ແກ່ບັນດາປະເທດທີ່ກຳລັງພັດທະນາໃນໂລກ.
ໃນນາມພັກ, ລັດຖະບານ, ສະພາແຫ່ງຊາດ ແລະປະຊາຊົນລາວບັນດາເຜົ່າ ພວກຂ້າພະເຈົ້າຂໍສະແດງຄວາມຊົມເຊີຍຢ່າງສຸດອົກສຸດໃຈ ຕໍ່ໝາກຜົນອັນໃຫຍ່ຫຼວງຮອບດ້ານທີ່ປະຊາຊົນຈີນອ້າຍນ້ອງຍາດມາໄດ້ ຕະຫຼອດໄລຍະຜ່ານມາ ແລະ ຂໍຖືໂອກາດອັນມີຄວາມໝາຍສຳຄັນນີ້ ອວຍພອນໄຊອັນປະເສີດມາຍັງພັກ, ລັດຖະບານ ແລະປະຊາຊົນຈີນ ໂດຍພາຍໃຕ້ການຊີ້ນຳ-ນຳພາອັນສະຫຼາດສ່ອງໃສຂອງພັກກອມມູນິດຈີນ ໂດຍມີສະຫາຍເລຂາທິການໃຫຍ່ ສີຈິ້ນຜີງ ເປັນຜູ້ນຳພານັ້ນ ຈົ່ງໄດ້ຮັບຜົນສຳເລັດໃໝ່ທີ່ໃຫຍ່ຫຼວງກວ່າເກົ່າ ໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ, ສຳເລັດເປົ້າໝາຍໃນການສ້າງສັງຄົມນິຍົມທີ່ມີຄວາມອີ່ມໜຳສຳລານ ກໍ່ຄືບັນລຸເປົ້າໝາຍສູ້ຊົນ 100 ປີ ສອງເຫດການ ເພື່ອບັນລຸຄວາມຝັນແຫ່ງການຟື້ນຟູຄວາມສີວິໄລຮຸ່ງເຮືອງຂອງປະຊາຊາດຈີນ.
ຂໍອວຍພອນໃຫ້ການຮ່ວມມືແບບຄູ່ຮ່ວມຍຸດທະສາດຮອບດ້ານໝັ້ນຄົງຍາວນານຕາມທິດ 4 ດີ ,ສາຍພົວພັນມິດຕະພາບອັນເປັນມູນເຊື້ອ ລະຫວ່າງສອງພັກ, ສອງລັດຖະບານ ,ສອງສະພາ ແລະ ປະຊາຊົນສອງຊາດລາວ ແລະຈີນ ຈົ່ງສືບຕໍ່ເຕີບໃຫຍ່ຂະຫຍາຍຕົວຢ່າງໜັກແໜ້ນໝັ້ນຄົງຍາວນານຕະຫຼອດໄປ ແລະນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ ແລະ ຈີນ.
ຂໍອວຍພອນໃຫ້ບັນດາສະຫາຍ ຈົ່ງມີພະລານາໄມສົມບູນ ແລະ ປະສົບຜົນສຳເລັດໃໝ່ໃຫຍ່ກວ່າເກົ່າ ໃນໜ້າທີ່ອັນມີກຽດສະຫງ່າ ແລະສູງສົ່ງຂອງພວກສະຫາຍ.
ມື້ດຽວກັນ, ທ່ານສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດແຫ່ງ ສປປ ລາວ ກໍໄດ້ສົ່ງໂທລະເລກອວຍພອນໄປຍັງທ່ານຫວາງອີ້ ລັດຖະມົນຕີກະຊວງການຕ່າງປະເທດຈີນ ເພື່ອອວຍພອນວັນສະຖາປະນາສາທາລະນະລັດປະຊາຊົນຈີນຄົບຮອບ 68 ປີ.
 |
