ຕາມຂ່າວ CRI: ເຈົ້າໜ້າທີ່ຕຳຫຼວດເມືອງລັສເວກັສ ທາງພາກຕາເວັນຕົກອາເມລິກາເປີດເຜີຍໃນຕອນບ່າຍວັນທີ 2 ຕຸລານີ້ວ່າ: ເຫດການຍິງປືນໃສ່ກຸ່ມຄົນທີ່ເກີດຂຶ້ນຢູ່ເມືອງຕົນໄດ້ເຮັດໃຫ້ຢ່າງໜ້ອຍ 59 ຄົນເສຍຊີວິດ, ອີກ 527 ຄົນໄດ້ຮັບບາດເຈັບ.
ອົງການສືບສວນແຫ່ງຊາດສະຫະລັດຫຼື FBI ກ່າວວ່າ: ປັດຈຸບັນຍັງບໍ່ມີຫຼັກຖານໃດໆສາມາດບົ່ງບອກວ່າເຫດການຄັ້ງນີ້ມີສ່ວນກ່ຽວພັນເຖິງກຸ່ມກໍ່ການຮ້າຍສາກົນ.
ເຫດການຄັ້ງນີ້ໄດ້ກາຍເປັນເຫດການໃຊ້ອາວຸດປືນກໍ່ຄວາມຮຸນແຮງທີ່ສົ່ງຜົນໃຫ້ມີຜູ້ເສຍຊີວິດແລະບາດເຈັບຫຼາຍທີ່ສຸດໃນປະຫວັດສາດຍຸກປະຈຸບັນຂອງອາເມລິກາ. ຂ່າວລາຍງານວ່າ, ມືປືນຜູ້ໜຶ່ງໄດ້ຍິງປືນໃສ່ກຸ່ມຄົນທີ່ກຳລັງເຂົ້າຮ່ວມງານດົນຕີຈາກຊັ້ນ 32 ຂອງໂຮງແຮມອ່າວມານດາເລເມືອງລັສເວກັສ. ຈາກນັ້ນ, ຕຳຫຼວດກໍບຸກເຂົ້າຫ້ອງທີ່ມືປືນລີ້ຕົວກໍ່ເຫດຫຼັງໄດ້ຮັບການແຈ້ງຄວາມ ແລະພົບວ່າຜູ້ຕ້ອງຫາໄດ້ເສຍຊີວິດແລ້ວ.
ທ່ານໂດນັນ ທຣຳ ປະທານາທິບໍດີອາເມລິກາໄດ້ຖະແຫຼງໃນວັນທີ 2 ຕຸລານີ້ໂດຍກ່າວປະນາມຢ່າງຮຸນແຮງຕໍ່ເຫດການດັ່ງກ່າວ, ແລະກ່າວວ່າຄະດີດັ່ງກ່າວແມ່ນ"ການກະທຳທີ່ຊົ່ວຮ້າຍທີ່ສຸດ",ພ້ອມກັນນັ້ນ, ທ່ານກໍຮຽກຮ້ອງໃຫ້ປະຊາຊົນອາເມລິກາຮັກສາຄວາມສາມັກຄີໃນທ່າມກາງຄວາມເສົ້າສະຫຼົດໃຈ.
ຈາກນັ້ນ, ທຳນຽບຂາວອາເມລິກາກໍໄດ້ອອກຖະແຫຼງການ ໂດຍຮຽກຮ້ອງໃຫ້ສິ່ງກໍ່ສ້າງທັງໝົດຂອງລັດຖະບານສະຫະລັດຊັກທຸງຊາດລົງເຄິ່ງເສົາເພື່ອສະແດງຄວາມໄວ້ອາໄລ.
ວັນທີ 2 ຕຸລານີ້, ທ່ານສີຈິ້ນຜິງ ປະທານປະເທດຈີນໄດ້ສົ່ງໂທລະເລກເຖິງທ່ານທຣຳ ປະທານາທິບໍດີອາເມລິກາ ໂດຍໄດ້ສະແດງຄວາມເຫັນອົກເຫັນໃຈຢ່າງສຸດຊຶ້ງຕໍ່ລັດຖະບານແລະປະຊາຊົນອາເມລິກາກໍລະນີເກີດເຫດການໃຊ້ອາວຸດປືນກໍ່ຄວາມຮຸນແຮງຢູ່ລັສເວກັສແລະເຮັດໃຫ້ຫຼາຍຄົນເສຍຊີວິດແລະບາດເຈັບ, ພ້ອມທັງສະແດງຄວາມໄວ້ອາໄລຢ່າງເລິກເຊິ່ງຕໍ່ຜູ້ປະສົບເຄາະຮ້າຍ, ສະແດງຄວາມເຫັນໃຈຢ່າງຈິງໃຈຕໍ່ຜູ້ໄດ້ຮັບບາດເຈັບ ແລະຂໍໃຫ້ຜູ້ໄດ້ຮັບບາດເຈັບຟື້ນຟູສຸຂະພາບໂດຍໄວ.
 |
