ຕາມຂ່າວສານຊີນຮວາ: ທ່ານຫຼີວເຈິ້ນໝີນ ຮອງເລຂາທິການໃຫຍ່ອົງການສະຫະປະຊາຊາດທີ່ຮັບຜິດຊອບວຽກງານເສດຖະກິດແລະສັງຄົມກ່າວໃນວັນທີ 2 ຕຸລານີ້ວ່າ: ການພັດທະນາແບບຍືນຍົງຄວນຖືມະນຸດແລະໜ່ວຍໂລກເປັນກົກ, ພ້ອມກັນນັ້ນ, ກໍຄວນເນັ້ນຄວາມສຳຄັນຂອງການຊຸກຍູ້ການພັດທະນາແບບກວມລວມແລະການສ້າງການປະກັນສັງຄົມ.
ທັງນີ້, ທ່ານຫຼີວເຈິ້ນໝີນໄດ້ກ່າວໃນພິທີໄຂກອງປະຊຸມຄະນະກຳມາທິການທີ 3 ທີ່ຮັບຜິດຊອບວຽກງານສັງຄົມ ມະນຸດສະທຳແລະວັດທະນະທຳຂອງສະມັດຊາໃຫຍ່ອົງການສະຫະປະຊາຊາດສະໄໝທີ 72 ວ່າ: ເນື່ອງຈາກວ່າການເຕີບໂຕຂອງເສດຖະກິດໄດ້ແຍກກັນກັບການສ້າງວຽກເຮັດງານທຳ, ສະນັ້ນ, ປັດຈຸບັນ, ເສດຖະກິດໂລກບໍ່ສາມາດສ້າງວຽກເຮັດງານທຳຢ່າງພຽງພໍແລະມີຄຸນນະພາບ, ຄວນເລັ່ງການພັດທະນາແບບກວມລວມທີ່ມີການປະກອບອາຊີຢ່າງເຕັມທີ່ແລະມີລັກສະນະການຜະລິດ; ປະເທດຕ່າງໆຕ້ອງສຸມໃສ່ກຸ່ມຄົນທີ່ຖືກເມີນເສີຍ ເຊັ່ນ: ຄົນພິການ, ຜູ້ເຖົ້າ, ຊາວໜຸ່ມ, ປະຊາຊົນພື້ນເມືອງ ແລະອື່ນໆ, ແລະແກ້ໄຂຄວາມຫ່ວງໃຍແລະບັນຫາຮີບດ່ວນຂອງເຂົາເຈົ້າໃນດ້ານການບັນລຸເປົ້າໝາຍການພັດທະນາແບບຍືນຍົງ. ທ່ານຫຼີວເຈິ້ນໝີນກ່າວຕື່ມວ່າ: ການປະກັນສັງຄົມແມ່ນວິທີທາງນະໂຍບາຍທີ່ສຳຄັນທີ່ສຸດໃນການຊຸກຍູ້ໃຫ້ຊີວິດການເປັນຢູ່ຂອງມວນມະນຸດໄດ້ຮັບການປັບປຸງແລະດີຂຶ້ນເລື້ອຍໆ. ແນວໃດກໍດີ, ພາກສ່ວນວຽກງານເສດຖະກິດແລະສັງຄົມອົງການສະຫະປະຊາຊາດຈະສຸມກຳລັງເຂົ້າໃນການເພີ່ມທະວີການສະໜັບສະໜູນໃນຂົງເຂດນີ້ຕື່ມອີກ.
 |
