ຕາມຂ່າວສານຊິ່ນຮວາ: ວັນທີ 4 ຕຸລານີ້, ການສົນທະນາວ່າດ້ວຍການປະຕິບັດກົດໝາຍແລະຄວາມໝັ້ນຄົງທາງອິນເຕີເນັດລະຫວ່າງຈີນກັບອາເມລິກາຮອບທຳອິດຈັດຂຶ້ນຢູ່ວໍຊິງຕັນ. ທ່ານກົ່ວເຊິ່ງຄຸ່ນ ທີ່ປຶກສາແຫ່ງລັດຈີນ ລັດຖະມົນຕີກະຊວງປ້ອງກັນຄວາມສະຫງົບຈີນແລະທ່ານເຈັຟ ເຊເຊິນສ໌ ລັດຖະມົນຕີກະຊວງຍຸຕິທຳອາເມລິກາໄດ້ຮ່ວມກັນເປັນປະທານຂອງການພົບປະສອງຝ່າຍ.
ທ່ານກົ່ວເຊິ່ງຄຸ່ນກ່າວວ່າ, ຈີນຍິນດີຮ່ວມກັບອາເມລິກາ, ຖືການສົນທະນາວ່າດ້ວຍການປະຕິບັດກົດໝາຍແລະຄວາມໝັ້ນຄົງທາງອິນເຕີເນັດລະຫວ່າງຈີນກັບອາເມລິກາຮອບທຳອິດເປັນໂອກາດ ເພື່ອສ້າງຕັ້ງແລະປັບປຸງກົນໄກໜ່ວຍງານໃຫ້ສົມບູນ, ລົງເລິກດຳເນີນການສືບສວນຄະດີ, ທຳຄວາມພະຍາຍາມເພື່ອໄດ້ຮັບໝາກຜົນຫຼາຍກວ່າເກົ່າໃນດ້ານຕ່າງໆ ເຊັ່ນ ນຳສົ່ງຊາວອົບພະຍົບຜິດກົດໝາຍຄືນປະເທດ, ການປາບປາມອາຊະຍະກຳທາງອິນເຕີເນັດແລະອື່ນໆ, ເພື່ອສ້າງຜົນງານໃໝ່ໃນການຮ່ວມມືດ້ານການປະຕິບັດກົດໝາຍແລະປ້ອງກັນຄວາມສະຫງົບຢ່າງບໍ່ຢຸດຢັ້ງ.
ທ່ານເຊເຊິນສ໌ ຢືນຢັນວ່າ, ອາເມລິກາຍິນດີຮ່ວມກັບຈີນ, ເພີ່ມທະວີການຮ່ວມມືໃນການປະຕິບັດກົດໝາຍແລະປ້ອງກັນຄວາມສະຫງົບຕື່ມອີກ ຕາມຄວາມເຫັນເອກະສັນກັນຂອງປະມຸກລັດສອງປະເທດ, ທັງຊຸກຍູ້ໃຫ້ການຮ່ວມມືໃນຂົງເຂດທີ່ກ່ຽວຂ້ອງລະຫວ່າງອາເມລິກາກັບຈີນພັດທະນາກ້າວໄປໜ້າຢ່າງບໍ່ຢຸດຢັ້ງ.
