ທ່ານໂມຮາເມັດ ຈາວັດ ຊາຣິຟ ລັດຖະມົນຕີກະຊວງການຕ່າງປະເທດອີຣານຢືນຢັນໃນວັນທີ 7 ຕຸລານີ້ວ່າ: ອີຣານພ້ອມແລ້ວຈະເປີດການເຈລະຈາແລະຕິດຕໍ່ພົວພັນທາງການທູດກັບອາຣັບບີຊາອຸດິດຄືນໃໝ່.
ສຳນັກຂ່າວສານທາສນິມຂອງອີຣານໄດ້ອ້າງຕາມຄຳເວົ້າຂອງທ່ານຊາຣິຟມາລາຍງານວ່າ: ປັດຈຸບັນ, ອີຣານແລະອາຣັບບີຊາອຸດິດຕ່າງກໍມີເຈດຈຳນົງໃນການເປີດການຕິດຕໍ່ພົວພັນກັນທາງການທູດຄືນໃໝ່.
ທ່ານຊາຣິຟຢືນຢັນວ່າ ອີຣານຍິນດີແລກປ່ຽນຄວາມເຫັນກັບອາຣັບບີຊາອຸດິດກ່ຽວກັບຄວາມຂັດແຍ້ງທາງຈຸດຢືນຂອງສອງຝ່າຍ.
ເດືອນມັງກອນປີ 2016 ຜ່ານມາ, ຝ່າຍອາຣັບບີຊາອຸດິດໄດ້ລົງໂທດປະຫານຊີວິດຜູ້ຖືກສົງໄສກໍ່ການຮ້າຍຫຼາຍຄົນ ໃນນີ້ມີນັກສາສະໜານິກາຍຊີ່ອະຄົນໜຶ່ງ ເຊິ່ງເປັນເຫດໃຫ້ປະຊາຊົນອີຣານປະທ້ວງດ້ວຍການທຳລາຍສະຖານທູດອາຣັບບີຊາອຸດິດປະຈຳອີຣານ, ຈາກນັ້ນ, ອາຣັບບີຊາອຸດິດແລະອີຣານກໍໄດ້ຕັດສາຍພົວພັນທາງການທູດລະຫວ່າງສອງປະເທດ.
 |
