ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ຈະຈັດຂຶ້ນຢູ່ນະຄອນຫຼວງປັກກິ່ງ ສປ ຈີນໃນວັນທີ 18 ຕຸລານີ້. ຫວ່າງກ່ອນນີ້ບໍ່ດົນໃນໂອກາດໃຫ້ສຳພາດຂ່າວ, ທ່ານເຈງຢຸງນຽນ ຫົວໜ້າສະຖາບັນຄົ້ນຄວ້າອາຊີຕາເວັນອອກຂອງມະຫາວິທະຍາໄລແຫ່ງຊາດສິງກະໂປໄດ້ສະແດງຄວາມເຫັນຂອງຕົນກ່ຽວກັບກອງປະຊຸມຄັ້ງນີ້ວ່າ, ໃນຫຼາຍປີຜ່ານມາ, ການພັດທະນາຂອງຈີນອອກຈາກການປະຕິຮູບແລະການກໍ່ສ້າງຢ່າງບໍ່ຢຸດຢັ້ງຂອງພັກກອມມູນິດຈີນບໍ່ໄດ້. ນັບແຕ່ຈັດກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 18 ມານີ້, ຈີນໄດ້ມີຄວາມກ້າວໜ້າຢ່າງຫຼວງຫຼາຍໃນດ້ານການພັດທະນາເສດຖະກິດຢ່າງຕໍ່ເນື່ອງ, ຄວາມໝັ້ນຄົງທາງສັງຄົມ, ການກໍ່ສ້າງຄວາມສາມາດປ້ອງກັນປະເທດແລະອື່ນໆ. ນອກນີ້, ການກໍ່ສ້າງລະບຽບຂອງພັກກໍ່ໄດ້ເສີມຂະຫຍາຍບົດບາດສຳຄັນໃນເລື່ອງດັ່ງກ່າວ, ເຊິ່ງມັນໄດ້ສອດຄ່ອງກັບຄວາມຕ້ອງການຂອງປະເທດ, ສັງຄົມແລະການປົກຄອງດ້ວຍກົດໝາຍ.
ທ່ານເຈງຢຸງນຽນກ່າວຕື່ມວ່າ, ການພັດທະນາຂອງປະເທດຕ້ອງການການນຳພາຂອງພັກການເມືອງທີ່ສະຫຼາດ, ພັກການເມືອງເຫຼົ່ານີ້ກໍຕ້ອງການນຳພາໂດຍຜູ້ນຳທີ່ເຂັ້ມແຂງ. ທ່ານເອງເຄີຍແລກປ່ຽນຄວາມຄິດເຫັນກັບທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ທ່ານສີຈິ້ນຜິງກ້າອອກຂໍ້ຕົກລົງເຮັດໃຫ້ທ່ານປະທັບໃຈຫຼາຍ.
ຈ້ອງມອງກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ທີ່ໃກ້ຈະມາເຖິງ, ທ່ານເຈງຢຸງນຽນເຫັນວ່ານີ້ບໍ່ພຽງແຕ່ກ່ຽວພັນເຖິງຂະບວນພັດທະນາຂອງຈີນໃນ 5 ປີຫຼື 10 ປີໃນອະນາຄົດ, ຍັງເປັນສິ່ງສຳຄັນທີ່ກ່ຽວພັນເຖິງການບັນລຸເປົ້າໝາຍພັດທະນາຮ້ອຍປີຂອງພັກກອມມູນິດຈີນແລະປະຊາຊາດຈີນ. "ຫວັງວ່າກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ນີ້ຈະກາຍເປັນຈຸດລ້ຽວອັນຍິ່ງໃຫຍ່ໃນຂະບວນຊົນຊາດຈີນຟື້ນຟູຄວາມຈະເລີນຮຸ່ງເຮືອງຄືນໃໝ່."