ຄຽງຄູ່ກັບຂໍ້ລິເລີ່ມ ແລະ ແຜນການຕ່າງໆ ເປັນຕົ້ນ "ໜຶ່ງແລວທາງໜຶ່ງເສັ້ນທາງ" ແລະ "ການຜະລິດຂອງຈີນ 2025" ທີ່ໄດ້ເສີມຂະຫຍາຍຢ່າງບໍ່ຢຸດຢັ້ງ, ວິສາຫະກິດຕ່າງປະເທດຢູ່ຈີນຕ່າງກໍເຫັນໄປໃນແງ່ດີຕໍ່ອະນາຄົດຂອງຕະຫຼາດແລະເສດຖະກິດຈີນໃນໄລຍະຍາວ ໂດຍອີງຕາມ "ບົດລາຍງານສະພາບແວດລ້ອມການດຳເນີນທຸລະກິດໃນໂລກ 2017" ຂອງທະນາຄານໂລກ, ໃນ 3 ປີຜ່ານມາ, ລະດັບຄວາມສະດວກຂອງການດຳເນີນທຸລະກິດຢູ່ຈີນໄດ້ກ້າວຂຶ້ນ 18 ລະດັບ ເຊິ່ງກ້າວຂຶ້ນສະເລ່ຍ 6 ລະດັບຕໍ່ປີ.
ຂ່າວລາຍງານວ່າ: ເມື່ອບໍ່ດົນຜ່ານມາ, ເຈົ້າໜ້າທີ່ວິສາຫະກິດຕ່າງປະເທດຢູ່ຈີນຫຼາຍແຫ່ງ ເປັນຕົ້ນ ບໍລິສັດ GE, ບໍລິສັດ EY, ບໍລິສັດ MasterCard ແລະບໍລິສັດ Kollmorgen ໄດ້ໃຫ້ສຳພາດຕໍ່ນັກຂ່າວວິທະຍຸສາກົນແຫ່ງປະເທດຈີນ ຫຼື CRI ວ່າ: ບັນດາແຜນຍຸດທະສາດທີ່ຍິ່ງໃຫຍ່ ເປັນຕົ້ນ "ການຜະລິດຂອງຈີນ 2025" ແລະ "ອິນເຕີເນັດ+" ພ້ອມດ້ວຍຂໍ້ລິເລີ່ມຕ່າງໆ ເຊັ່ນ "ໜຶ່ງແລວທາງໜຶ່ງເສັ້ນທາງ" ທີ່ຈີນເສີມຂະຫຍາຍຢ່າງບໍ່ຢຸດຢັ້ງໃນຊຸມປີມໍ່ໆມານີ້ ໄດ້ສ້າງໂອກາດພັດທະນາທີ່ສຳຄັນໃຫ້ແກ່ວິສາຫະກິດຕ່າງປະເທດຢູ່ຈີນ, ຂະນະທີ່ຕົນກໍມີເຫດຜົນຢ່າງເຕັມສ່ວນທີ່ເຫັນໄປໃນແງ່ດີຕໍ່ຕະຫຼາດຈີນ ແລະ ມີຄວາມໝັ້ນໃຈຕໍ່ອະນາຄົດຂອງເສດຖະກິດຈີນ.ຂະນະທີ່ຜົນການສຳຫຼວດຂອງກອງປະຊຸມພັດທະນາການຄ້າ ອົງການສະຫະປະຊາຊາດກໍປາກົດວ່າ ຈີນຍັງຄົງແມ່ນໜຶ່ງໃນເປົ້າໝາຍການລົງທຶນທີ່ບໍລິສັດຂ້າມຊາດນິຍົມກວ່າໝູ່.
