ຕາມຂ່າວ CRI: ຫວ່າງມໍ່ໆມານີ້, ຜູ້ອຳນວຍການໃຫຍ່ອົງການພະລັງງານປະລະມານູສາກົນກ່າວວ່າ, ອີຣານໄດ້ປະຕິບັດພັນທະຂອງຕົນໃນຂົງເຂດນິວເຄຼຍທີ່ກຳນົດໄວ້ໃນສັນຍານິວເຄຼຍອີຣານ. ຜູ້ຕາງໜ້າລະດັບສູງທີ່ຮັບຜິດຊອບການຕ່າງປະເທດແລະນະໂຍບາຍຄວາມປອດໄພຂອງສະຫະພາບເອີລົບ, ລັດຖະມົນຕີການຕ່າງປະເທດຣັດເຊຍແລະເຢຍລະມັນກໍໄດ້ຕີລາຄາຢ່າງຕັ້ງໜ້າຕໍ່ສັນຍານິວເຄຼຍອີຣານເຊັ່ນດຽວກັນ.
ໃນພິທີຖະແຫຼງຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງ ສປ ຈີນໃນວັນທີ 10 ຕຸລານີ້, ທ່ານນາງຮ້ວາຊຸນຢີງ ໂຄສົກກະຊວງການຕ່າງປະເທດຈີນກ່າວວ່າ, ຫວັງໃຫ້ບັນດາຝ່າຍສືບຕໍ່ຮັກສາແລະປະຕິບັດສັນຍານິວເຄຼຍອີຣານໃຫ້ດີ. "ສັນຍານິວເຄຼຍອີຣານແມ່ນໝາກຜົນສຳຄັນຂອງລັດທິຫຼາຍຝ່າຍ, ແມ່ນແບບຢ່າງທີ່ແກ້ໄຂບັນຫາຈຸດສຸມສາກົນໂດຍຜ່ານວິທີທາງການເມືອງ, ໄດ້ເສີມຂະຫຍາຍບົດບາດສຳຄັນຕໍ່ການຮັກສາລະບົບບໍ່ແຜ່ອາວຸດນີວເຄຼຍສາກົນແລະຊຸກຍູ້ສັນຕິພາບແລະສະຖຽນລະພາບຂອງເຂດຕາເວັນອອກກາງ, ໄດ້ຮັບຄວາມເຫັນພ້ອມແລະການສະໜັບສະໜູນຢ່າງກວ້າງຂວາງຈາກປະຊາຄົມໂລກ. ພວກເຮົາຫວັງໃຫ້ຝ່າຍຕ່າງໆຈົ່ງຍຶດໝັ້ນຄວາມປາຖະໜາດ້ານການເມືອງຂອງຕົນ, ສືບຕໍ່ຮັກສາແລະປະຕິບັດສັນຍາດັ່ງກ່າວໃຫ້ດີ, ເຊິ່ງມັນໄດ້ສອດຄ່ອງກັບຜົນປະໂຫຍດພື້ນຖານຂອງບັນດາຝ່າຍ."
 |
