ເມື່ອບໍ່ດົນມານີ້, ທ່ານໂຮເຊ ຣາມອນ ບາລາເກີ ເລຂາທິການສູນກາງພັກກອມມູນິດກູບາ ທັງເປັນຫົວໜ້າຄະນະພົວພັນຕ່າງປະເທດສູນກາງພັກ ໄດ້ເດີນທາງຢ້ຽມຢາມຈີນ ແລະ ໄດ້ໃຫ້ສຳພາດຕໍ່ນັກຂ່າວວິທະຍຸສາກົນແຫ່ງປະເທດຈີນ ຫຼື CRI.
ທ່ານບາລາເກີ ກ່າວວ່າ: ພັກກອມມູນິດກູບາ ແລະ ພັກກອມມູນິດຈີນ ໄດ້ປະຕິບັດຕໍ່ກັນຢ່າງຈິງໃຈ ທັງໄວ້ເນື້ອເຊື່ອໃຈກັນ ແລະ ການໄປມາຫາສູ່ແລກປ່ຽນກັນລະຫວ່າງສອງພັກກໍໄດ້ຮັບຜົນຢ່າງຫຼວງຫຼາຍ. ຂະນະທີ່ໃນຊຸມປີມໍ່ໆມານີ້, ພັກກອມມູນິດຈີນໄດ້ດຳເນີນການບໍລິຫານພັກຢ່າງເຂັ້ມງວດແລະຮອບດ້ານ ໂດຍໄດ້ຮັບປະສິດທິຜົນຢ່າງພົ້ນເດັ່ນ ເຊິ່ງມີຄວາມໝາຍສຳຄັນຍິ່ງຕໍ່ການເພີ່ມທະວີແລະເສີມຂະຫຍາຍພາລະກິດສ້າງສາສັງຄົມຂອງສັງຄົມນິຍົມປະເທດຈີນ.
ເມື່ອເວົ້າເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນທີ່ຈະໄຂຂຶ້ນໃນໄວໆນີ້, ທ່ານບາລາເກີ ກ່າວວ່າ: ພວກຂ້າພະເຈົ້າເຊື່ອວ່າ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນ ຈະສາມາດປັບປຸງພາລະກິດການສ້າງສາແລະພັດທະນາສັງຄົມຂອງສັງຄົມນິຍົມທີ່ມີສີສັນພິເສດຂອງຈີນໃຫ້ຈະເລີນຮຸ່ງເຮືອງຕື່ມອີກ. ພວກຂ້າພະເຈົ້າເຊື່ອໝັ້ນຢ່າງໜັກແໜ້ນວ່າ, ພາຍໃຕ້ການນຳພາຂອງພັກກອມມູນິດຈີນ, ຈີນຈະສາມາດຍາດໄດ້ຜົນງານທີ່ສະຫງ່າລາສີຍິ່ງຂຶ້ນ ແລະ ການຮ່ວມມືທີ່ເຕັມໄປດ້ວຍໄມຕີຈິດມິດຕະພາບລະຫວ່າງສອງພັກກູບາ-ຈີນ ກໍຈະໄດ້ຮັບໝາກຜົນຫຼາຍຂຶ້ນກວ່າເກົ່າ.
