ກະຊວງການຕ່າງປະເທດອາເມລິກາປະກາດໃນວັນທີ 12 ຕຸລານີ້ ໂດຍຕົກລົງຈະຖອນອອກຈາກອົງການສຶກສາ, ວິທະຍາສາດ ແລະ ວັດທະນະທຳ ຫຼື ອຸຍເນັສໂກ ສະຫະປະຊາຊາດ. ອີງຕາມມາດຕາທີ່ກ່ຽວຂ້ອງ, ການຖອນຕົວຂອງອາເມລິກາຈະເລີ່ມມີຜົນສັກສິດໃນວັນທີ 31 ທັນວາປີ 2018.
ທັງນີ້ ກະຊວງການຕ່າງປະເທດອາເມລິກາ ໄດ້ອອກຖະແຫຼງການໃນວັນດັ່ງກ່າວວ່າ: ປະເທດຕົນຕົກລົງຖອນອອກຈາກອົງການອຸຍເນັສໂກ ໂດຍຕົ້ນຕໍພິຈາລະນາເຖິງສິ່ງທີ່ໜ້າສົນໃຈຕ່າງໆ ລວມທັງຕິດໜີ້ຄ່າສະມາຊິກ, ອົງການອຸຍເນັສໂກຕ້ອງການປະຕິຮູບຢ່າງເຖິງກົກເຖິງຮາກ ແລະ ອົງການດັ່ງກ່າວມີຄວາມລຳອຽງຕໍ່ອິສຣາແອນຢ່າງຕໍ່ເນື່ອງ.
ທ່ານນາງອີຣີນາ ໂບໂກວາ ຜູ້ອຳນວຍການອົງການອຸຍເນັສໂກ ໄດ້ສະແດງຄວາມເສຍດາຍຕໍ່ອາເມລິກາຖອນອອກຈາກອົງການຕົນ.
ຄວາມຈິງແລ້ວ, ເທື່ອນີ້ບໍ່ແມ່ນເທື່ອທຳອິດທີ່ອາເມລິກາຖອນອອກຈາກອົງການດັ່ງກ່າວ ຄື ເມື່ອປີ 1984, ລັດຖະບານຣີເກນ ສະຫະລັດອາເມລິກາ ກໍໄດ້ຕຳໜິອົງການອຸຍເນັສໂກ ມີບັນຫາຕ່າງໆ ເປັນຕົ້ນ ການສໍ້ລາດບັງຫຼວງ ແລະ ການຄຸ້ມຄອງບໍ່ມີລະບຽບ ຈຶ່ງປະກາດຖອນອອກຈາກອົງການດັ່ງກ່າວ ຈາກນັ້ນຈົນມາເຖິງປີ 2003, ອາເມລິກາຈຶ່ງກັບຄືນເປັນສະມາຊິກອົງການດັ່ງກ່າວອີກ.