ວັນທີ 14 ຕຸລານີ້, ທ່ານໂມຮາເມັດ ບູຮາຣີ ປະທານາທິບໍດີນີເຊຣີ ໄດ້ມອບໝາຍໃຫ້ທີ່ປຶກສາພິເສດດ້ານສື່ມວນຊົນແລະໂຄສະນາຂອງຕົນເຜີຍແຜ່ຈົດໝາຍອວຍພອນເຖິງທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ,ປະທານປະເທດຈີນໃນສື່ສັງຄົມອ໋ອນລາຍໂດຍອວຍພອນໃຫ້ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19ຈົ່ງປະສົບຜົນສຳເລັດຢ່າງຈົບງາມ.
ໃນເນື້ອໃນຈົດໝາຍອວຍພອນລະບຸວ່າ, ທ່ານບູຮາຣີມີຄວາມເຊື່ອໝັ້ນຕໍ່ກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນເຊິ່ງຈະເປັນຈຸດເລີ່ມຕົ້ນໃໝ່ໃນປະຫວັດສາດຈີນ ແລະເປັນການໄຂຍຸກສະໄໝທີ່ຍິ່ງໃຫຍ່ໃຫ້ແກ່ພັກແລະປະເທດຈີນ. ຈີນໄດ້ຮັບຜົນສຳເລັດທີ່ປະຈັກຕາຕໍ່ຊາວໂລກພາຍໃຕ້ການນຳພາຂອງພັກກອມມູນິດຈີນ ແລະເປັນແບບຢ່າງໃຫ້ແກ່ປະເທດພວມພັດທະນາກໍຄືທົ່ວໂລກຢ່າງສະເໝີຕົ້ນສະເໝີປາຍ. ຕະຫຼອດໄລຍະ 30 ກວ່າປີຜ່ານມາ, ປະຊາຊົນຈີນ 700 ລ້ານກວ່າຄົນໄດ້ຫຼຸດພົ້ນອອກຈາກຄວາມທຸກຍາກ ຖືວ່າເປັນສິ່ງມະຫັດສະຈັນໃນປະຫວັດການຫຼຸດຜ່ອນຄວາມທຸກຍາກ.
ນອກນີ້, ທ່ານບູຮາຣີຍັງໄດ້ສະແດງຄວາມເພິ່ງພໍໃຈຕໍ່ຜົນງານການຮ່ວມມືແບບຕ່າງຝ່າຍຕ່າງມີຜົນປະໂຫຍດລະຫວ່າງນີເຊຣີກັບຈີນແລະຢືນຢັນວ່າ ພວກຂ້າພະເຈົ້າຄອງຄອຍທິດທາງນະໂຍບາຍການພັດທະນາແລະການພົວພັນກັບຕ່າງປະເທດຂອງຈີນໃນ 5 ປີຕໍ່ໜ້າກໍຄືໃນອະນາຄົດຕໍ່ໆໄປ ພ້ອມດ້ວຍການຄັດເລືອກຄະນະກຳມະການສູນກາງພັກກອມມູນິດຈີນຊຸດໃໝ່. ຂໍອວຍພອນໃຫ້ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ຈົ່ງປະສົບຜົນສຳເລັດຢ່າງຈົບງາມ.
 |
