ໂອກາດທີ່ຈະໄຂກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 , ນັກວິຊາການຂອງຣັດເຊຍຫຼາຍທ່ານໄດ້ຍ້ອງຍໍຕໍ່ຜົນສຳເລັດແຫ່ງການພັດທະນາສັງຄົມແລະເສດຖະກິດຂອງຈີນໃນຂະນະທີ່ໃຫ້ສຳພາດຕໍ່ນັກຂ່າວ CRI ແລະໄດ້ແບກຫາບຄວາມຮັບຜິດຊອບທີ່ເປັນປະເທດໃຫຍ່ໃນເວທີການຕ່າງປະເທດ.
ທ່ານເຊີເກ ລູເຈຍນິງ ຫົວໜ້າສະຖາບັນຕາເວັນອອກໄກຂອງສະຖາບັນວິທະຍາສາດຣັດເຊຍກ່າວວ່າ: ໃນ 5 ປີຜ່ານມາ, ຜົນສຳເລັດແຫ່ງການພັດທະນາເສດຖະກິດຂອງຈີນບໍ່ພຽງແຕ່ໄດ້ສະແດງໃຫ້ເຫັນໃນດ້ານການເຕີບໂຕຂອງຕົວເລກດັດຊະນີມະຫາພາກລາຍການຕ່າງໆໃນຫຼາຍຂົງເຂດເທົ່ານັ້ນເຊັ່ນ: ອຸດສາຫະກຳ,ການຄ້າແລະການລົງທຶນເປັນຕົ້ນ,ແຕ່ຍັງເປັນປະໂຫຍດຕໍ່ຊີວິດການເປັນຢູ່ຂອງປະຊາຊົນຈີນໂດຍທົ່ວໄປອີກດ້ວຍ ໂດຍລາຍຮັບສະເລ່ຍຂອງປະຊາຊົນແລະລະດັບສະຫວັດດີການສັງຄົມລ້ວນແຕ່ໄດ້ຮັບການຍົກສູງຂຶ້ນຢ່າງຈະແຈ້ງ.
ທ່ານ ຢຸຣີ ຕາຟໂຣຟສະກີ ນັກຄົ້ນຄວ້າປະຫວັດສາດແລະວັດທະນະທຳຈີນຂອງຣັດເຊຍຊີ້ໃຫ້ເຫັນວ່າ: ຕົວເລກສະຖິຕິສະແດງໃຫ້ເຫັນວ່າ: ໃນ 5 ປີຜ່ານມາ, ເສດຖະກິດຈີນໄດ້ຮັກສາຈັງຫວະການເຕີບໂຕໃນລະດັບກາງແລະສູງ. ດ້ານໜຶ່ງເສດຖະກິດໄດ້ເຕີບໂຕຂຶ້ນ,ອີກດ້ານໜຶ່ງ "ກະເປົາເງິນ "ຂອງປະຊາຊົນກໍເຕັມຂຶ້ນຄູ່ກັນ ເຊິ່ງເຮັດໃຫ້ປະຊາຊົນໄດ້ເຫັນຜົນປະໂຫຍດທີ່ແທ້ຈິງ. ທ່ານ ຢຸຣີ ຕາຟໂຣຟສ໌ກີ ກ່າວຕື່ມວ່າ: ຕົນກໍຮູ້ສຶກອິດສາຫຼາຍ.
ນັກວິຊາການຂອງຣັດເຊຍອີກທ່ານໜຶ່ງໄດ້ໃຫ້ສຳພາດຕໍ່ນັກຂ່າວວ່າ: ໃນ 5 ປີຜ່ານມາ, ການພົວພັນຄູ່ຮ່ວມມືປະສານງານຍຸດທະສາດຮອບດ້ານລະຫວ່າງຈີນ-ຣັດເຊຍໄດ້ພັດທະນາເຂົ້າສູ່ລວງເລິກຢ່າງບໍ່ຢຸດຢັ້ງ. ຣັດເຊຍແມ່ນຜູ້ສະໜັບສະໜູນ,ຜູ້ເຂົ້າຮ່ວມແລະຜູ້ທີ່ໄດ້ຮັບຜົນປະໂຫຍດຈາກຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ",ແລະເຊື່ອໝັ້ນວ່າໃນອະນາຄົດ ການຮ່ວມມືແລະການເຊື່ອມຕໍ່"ໜຶ່ງແລວທາງໜຶ່ງເສັ້ນທາງ"ກັບສະຫະພັນເສດຖະກິດອາຊີເອີຣົບຍ່ອມຈະໄດ້ຮັບໝາກຜົນທີ່ອຸດົມສົມບູນຫຼາຍຂຶ້ນກວ່າເກົ່າ.
 |
