ຈີນຈະສ້າງຕັ້ງອົງການຄຸ້ມຄອງຊັບສິນຊັບພະຍາກອນທຳມະຊາດແຫ່ງລັດ ແລະຕິດຕາມຄຸ້ມຄອງຊີວະພາບ ເປັນຄັ້ງທຳອິດ ຫຼັງສຳເລັດກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ເພື່ອເພີ່ມທະວີການນຳພາການຈັດຕັ້ງແລະອອກແບບລວມຂອງການກໍ່ສ້າງນິເວດອາລະຍະທຳທົ່ວປະເທດ.
ທັງນີ້ ທ່ານສີຈິ້ນຜິງ ໄດ້ກ່າວໃນພິທີເປີດກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ທີ່ໄຂຂຶ້ນໃນວັນທີ 18 ຕຸລານີ້ວ່າ: ຈີນຈະສ້າງສາທັນສະໄໝນັ້ນ ແມ່ນທັນສະໄໝແບບມະນຸດກັບສິ່ງແວດລ້ອມດຳລົງຄົງຕົວຢ່າງເປັນມິດກັນ ສະນັ້ນ, ຈີນຈະສ້າງຕັ້ງອົງການຄຸ້ມຄອງຊັບສິນຊັບພະຍາກອນທຳມະຊາດແຫ່ງລັດ ແລະຕິດຕາມຄຸ້ມຄອງຊີວະພາບ ເພື່ອປະຕິບັດໜ້າທີ່ຮັບຜິດຊອບຂອງຜູ້ທີ່ມີກຳມະສິດຕໍ່ຊັບສິນຊັບພະຍາກອນທຳມະຊາດທົ່ວປວງຊົນຢ່າງເປັນເອກະພາບ, ປະຕິບັດໜ້າທີ່ຮັບຜິດຊອບການຄຸ້ມຄອງການນຳໃຊ້ພື້ນທີ່ດິນແດນແຫ່ງຊາດທັງໝົດ, ປົກປັກຮັກສາແລະແກ້ໄຂບັນຫາທຳມະຊາດຢ່າງເປັນເອກະພາບ, ປະຕິບັດໜ້າທີ່ຮັບຜິດຊອບການຕິດຕາມຄຸ້ມຄອງການປ່ອຍສິ່ງມົນລະພິດປະເພດຕ່າງໆຢູ່ຕົວເມືອງແລະຊົນນະບົດ ແລະ ປະຕິບັດກົດໝາຍການບໍລິຫານຢ່າງເປັນເອກະພາບ, ສຸມໃສ່ແກ້ໄຂບັນຫາສິ່ງແວດລ້ອມທີ່ພົ້ນເດັ່ນ ເປັນຕົ້ນ ມົນລະພິດທາງອາກາດ, ນ້ຳ ແລະ ດິນ, ຕັ້ງໜ້າເຂົ້າຮ່ວມການຄຸ້ມຄອງສິ່ງແລດລ້ອມຂອງໂລກ, ປະຕິບັດຕາມຄຳໝັ້ນສັນຍາດ້ານການຫຼຸດຜ່ອນປ່ອຍມົນລະພິດ ແລະ ເພີ່ມຄວາມເຂັ້ມງວດໃນການອະນຸລັກລະບົບນິເວດ.
