ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນ ໄດ້ໄຂຂຶ້ນຢູ່ນະຄອນຫຼວງປັກກິ່ງໃນຕອນເຊົ້າວັນທີ 18 ຕຸລານີ້, ທ່ານ ສີຈິ້ນຜິງ ຕາງໜ້າຄະນະກຳມະການສູນກາງພັກສະໄໝທີ 18 ຜ່ານບົດລາຍງານຕໍ່ກອງປະຊຸມ, ວາງແຜນລວມເພື່ອການພັດທະນາຂອງຈີນໃນອະນາຄົດ.
ຜູ້ແທນກອງປະຊຸມ 2200 ກວ່າທ່ານທີ່ເລືອກຕັ້ງຈາກສະມາຊິກພັກ 89 ລ້ານກວ່າຄົນຈະພິຈາລະນາບົດລາຍງານຂອງທ່ານ ສີຈິ້ນຜິງ ແລະບົດລາຍງານວຽກງານຂອງຄະນະກວດກາວິໄນສູນກາງພັກສະໄໝກ່ອນ, ສຳຫຼວດພິຈາລະນາ "ກົດລະບຽບພັກກອມມູນິດຈີນ" ສະບັບປັບປຸງ ແລະເລືອກຕັ້ງຄະນະກຳມະການສູນກາງ ແລະຄະນະກວດກາສູນກາງພັກສະໄໝໃໝ່.
ພັກກອມມູນິດຈີນແມ່ນພັກກຳອຳນາດຂອງຈີນ ແລະ ກໍແມ່ນພັກການເມືອງທີ່ໃຫຍ່ທີ່ສຸດໃນໂລກ. ກອງປະຊຸມໃຫຍ່ທົ່ວປະເທດຂອງພັກກອມມູນິດຈີນຈັດຂຶ້ນ 5 ປີໃດເທື່ອໜຶ່ງ, ກອງປະຊຸມໃຫຍ່ທົ່ວປະເທດ ແລະ ຄະນະກຳມະການສູນກາງທີ່ເລືອກຕັ້ງໂດຍກອງປະຊຸມໃຫຍ່ແມ່ນອົງການນຳພາສູງສຸດຂອງພັກກອມມູນິດຈີນ.