ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໄດ້ໄຂຂຶ້ນຢູ່ນະຄອນຫຼວງປັກກິ່ງໃນວັນທີ 18 ຕຸລານີ້. ສື່ມວນຊົນຫວຽດນາມໄດ້ສົນໃຈນຳກອງປະຊຸມຄັ້ງນີ້ຢ່າງຫຼວງຫຼາຍ, ພ້ອມທັງໄດ້ຕີລາຄາສູງຕໍ່ຜົນງານດ້ານການພັດທະນາທີ່ຈີນໄດ້ຮັບນັບແຕ່ກອງປະຊຸມໃຫຍ່ຄັ້ງທີ 18 ເປັນຕົ້ນມາ, ເຫັນວ່າ ກອງປະຊຸມໃຫຍ່ພັກກອມມູນິດຈີນຄັ້ງທີ 19 ມີຄວາມໝາຍພິເສດ ໂດຍຈະຊີ້ທິດໃຫ້ແກ່ການພັດທະນາຂອງຈີນ.
ວັນທີ 17 ຕຸລານີ້, ເວັບໄຊຫວຽດນາມເອັກແປຼສ໌ ໄດ້ພິມບົດຄວາມທີ່ມີຫົວຂໍ້ວ່າ "ຄວາມສຳຄັນຂອງກອງປະຊຸມໃຫຍ່ພັກກອມມູນິດຈີນຄັ້ງທີ 19 ແລະອະນາຄົດຂອງຈີນ" ໂດຍຊີ້ອອກວ່າ, ໃນ 5 ປີຜ່ານມາ, ຈີນໄດ້ຮັບຄວາມຄືບໜ້າອັນໃຫຍ່ຫຼວງໃນການຕ້ານການສໍ້ລາດບັງຫຼວງ, ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ເພີ່ມທະວີການປ້ອງກັນປະເທດ, ຍົກສູງພາບພົດໃນເວທີສາກົນ ແລະດ້ານອື່ນໆ.
ວັນທີ 17 ຕຸລານີ້, ເວັບໄຊທາງການຂອງຂ່າວສານຫວຽດນາມ ໄດ້ພິມບົດຄວາມທີ່ໃສ່ຫົວຂໍ້ວ່າ "ກອງປະຊຸມໃຫຍ່ຄັ້ງທີ 19: ຊີ້ທິດຂະຫຍາຍຂອງຈີນໃນອະນາຄົດ" ໂດຍຂຽນວ່າ, ອັດຕາການປະກອບສ່ວນຂອງຈີນທີ່ມີຕໍ່ການເຕີບໂຕຂອງເສດຖະກິດໂລກໄດ້ຍົກສູງຂຶ້ນຢ່າງບໍ່ຢຸດຢັ້ງ ເຊິ່ງພວມປ່ຽນແປງສະຖານະການເສດຖະກິດໂລກເປັນກ້າວໆ.
ເວັບໄຊຂອງໜັງສືພິມຊາວໜຸ່ມຫວຽດນາມ ຍົກໃຫ້ເຫັນວ່າ: ນັບແຕ່ກອງປະຊຸມໃຫຍ່ຄັ້ງທີ 18 ເປັນຕົ້ນມາ, ການຕໍ່ສູ້ຕ້ານການສໍ້ລາດບັງຫຼວງ "ຕີເສືອຕົບແມງວັນ" ໃນທົ່ວປະເທດທີ່ທ່ານເລຂາທິການໃຫຍ່ ສີຈິ້ນຜິງ ເປັນຜູ້ກໍ່ຕັ້ງຂຶ້ນນັ້ນ ໄດ້ຮັບຜົນງານຢ່າງພົ້ນເດັ່ນ, ທ່ານຍັງໄດ້ສະເໜີຂໍ້ລິເລີ່ມຕ່າງໆ ເຊັ່ນ "ໜຶ່ງແລວທາງໜຶ່ງເສັ້ນທາງ" ເປັນຕົ້ນ ແລະໄດ້ຈັດຕັ້ງປະຕິບັດ ໂດຍໄດ້ຍົກສູງຖານະບົດບາດຂອງຈີນໃນເວທີສາກົນຂຶ້ນຕື່ມອີກ.