ອົງການສະຖິຕິແຫ່ງລັດຈີນເປີດເຜີຍ ໃນວັນທີ 19 ຕຸລານີ້ວ່າ, ລວມຍອດຜະລິດຕະພັນພາຍໃນ ຫຼື GDP ຂອງຈີນໃນສາມໄຕມາດປີນີ້ ໄດ້ເພີ່ມຂຶ້ນ 6,9% ເຊິ່ງລື່ນກວ່າໄລຍະດຽວກັນຂອງປີຜ່ານມາ 0,2%. ທາງການຈີນກ່າວວ່າ, ໃນສາມໄຕມາດປີນີ້, ເສດຖະກິດແຫ່ງຊາດມີຈັງຫວະພັດທະນາຢ່າງໝັ້ນທ່ຽງໂດຍລວມ, ຄວາມເຂັ້ມແຂງໃນການພັດທະນາ ກໍເພີ່ມຂຶ້ນຢ່າງພົ້ນເດັ່ນ ແລະຈາກນີ້ຈຶ່ງຄາດວ່າ, ປີນີ້ ຈະບັນລຸຕາມເປົ້າໝາຍທີ່ຕັ້ງໄວ້.
ຂ່າວແຈ້ງວ່າ, ນັບແຕ່ຕົ້ນປີນີ້ມາ, ການປະຕິຮູບອົງປະກອບການສະໜອງຂອງຈີນ ໄດ້ກ້າວສູ່ລວງເລິກ, ການຄ້ານຳເຂົ້າແລະສົ່ງອອກ ໄດ້ຮັກສາການເຕີບໂຕຢ່າງວ່ອງໄວ, ບັນຊີກະແສລາຍວັນໄດ້ຮັກສາການໄດ້ດຸນ, ອັດຕາແລກປ່ຽນເງິນຢວນ ໄດ້ຮັກສາຄວາມໝັ້ນທ່ຽງໂດຍພື້ນຖານ, ຄັງສຳຮອງເງິນຕາຕ່າງປະເທດ ໄດ້ເພີ່ມຂຶ້ນໃນ 8 ເດືອນຕິດຕໍ່ກັນ; ຂະນະດຽວກັນ, ໃນ 3 ໄຕມາດຂອງປີນີ້, ລາຍໄດ້ຂອງປະຊາຊົນ ໄດ້ເພີ່ມຂຶ້ນ 7,5% ເຊິ່ງລື່ນກວ່າໄລຍະດຽວກັນຂອງປີຜ່ານມາ 1,2% ທັງໄວກວ່າການເຕີບໂຕຂອງ GDP.
ໃນຕົ້ນປີນີ້, ທາງການຈີນໄດ້ວາງເປົ້າໝາຍເຕີບໂຕຂອງເສດຖະກິດໃນປີນີ້ຄືປະມານ 6,5%, ແລະເນື່ອງຈາກເສດຖະກິດຈີນໄດ້ຮັບການພັດທະນາດີຂຶ້ນນັບແຕ່ຕົ້ນປີນີ້ມາ, ຈຶ່ງເຮັດໃຫ້ຫວ່າງມໍ່ໆນີ້, ອົງການກອງທຶນເງິນຕາສາກົນ ໄດ້ປັບຄາດໝາຍການເຕີບໂຕຂອງເສດຖະກິດຈີນໃນປີນີ້ໃຫ້ສູງຂຶ້ນເຖິງ 6,8% ແລະ ທະນາຄານໂລກ ປັບໃຫ້ສູງຂຶ້ນເຖິງ 6,7%.
 |
