ວັນທີ 20 ຕຸລານີ້, ຜູ້ແທນທີ່ເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ຈາກວົງການວັດທະນະທຳແລະສິລະປະໄດ້ແລກປ່ຽນຄວາມຄິດຄວາມເຫັນກັບນັກຂ່າວຈີນແລະຕ່າງປະເທດກ່ຽວກັບຫົວຂໍ້ ການພັດທະນາດ້ານວັດທະນະທຳໄດ້ເຂົ້າສູ່ໄລຍະໃໝ່.
ອີງຕາມສັນຍາຮ່ວມມືລະຫວ່າງວິທະຍຸສາກົນແຫ່ງປະເທດຈີນ CRI ກັບໂທລະພາບແຫ່ງຊາດປາກີສະຖານ, ລະຄອນໂທລະພາບຈີນເລື່ອງ"ຊາວໜຸ່ມປັກກິ່ງ"ພາກສຽງພາສາເອີດູຈະເລີ່ມອອກອາກາດໃນຊ່ອງໂທລະພາບແຫ່ງຊາດປາກີສະຖານໃນຕົ້ນເດືອນພະຈິກປີນີ້. ທ່ານຊຸນຟິຄາ ອາຮາເມັດ ຮອງຜູ້ອຳນວຍການໂທລະພາບແຫ່ງຊາດປາກີສະຖານໄດ້ຕີລາຄາສູງຕໍ່ລະດັບແປຂອງລະຄອນໂທລະພາບດັ່ງກ່າວ, ທ່ານຫວັງວ່າລະຄອນເລື່ອງນີ້ຈະສາມາດໄດ້ຮັບຄວາມນິຍົມຊົມຊອບຈາກຜູ້ຊົມປາກີສະຖານ.
ທ່ານເຊ້ຍຢົງໝີນ ຜູ້ແທນກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19, ຫົວໜ້າສູນກະຈາຍສຽງຕໍ່ພາກພື້ນອາຊີຕາເວັນຕົກແລະອາຟຼຼຼຼຼິກາຂອງ CRI ບອກໃຫ້ຮູ້ວ່າ: ວັດທະນະທຳແມ່ນວິທີສຳຄັນໃນການສ້າງຂົວຕໍ່ລະຫວ່າງຈິດໃຈປະຊາຊົນ, ຍັງແມ່ນເນື້ອໃນທີ່ດີສຳລັບການເຜີຍແຜ່ຕໍ່ຕ່າງປະເທດ. ໃນຫຼາຍປີມານີ້, CRI ໄດ້ຈັດກິດຈະກຳແລກປ່ຽນດ້ານວັດທະນະທຳຫຼາຍຮູບການເຊິ່ງລວມທັງການແປຮູບເງົາແລະລະຄອນໂທລະພາບ ເຊິ່ງໄດ້ຊຸກຍູ້ການແລກປ່ຽນດ້ານວັດທະນະທຳລະຫວ່າງຈີນກັບປະເທດຕ່າງໆໃນໂລກ, ຜ່ານການລາຍງານຂອງສື່ມາເພີ່ມທະວີຄວາມເຂົ້າໃຈກັນລະຫວ່າງປະຊາຊົນບັນດາປະເທດ ແມ່ນໜ້າທີ່ຂອງສື່ມວນຊົນ, ຍັງແມ່ນວີທີສຳຄັນໃນການຊຸກຍູ້ການແລກປ່ຽນດ້ານວັດທະນະທຳ.
ໃນຫຼາຍປີມານີ້, ຄຽງຄູ່ກັບກຳລັງສັງລວມຂອງຈີນໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ, ປະຊາຄົມໂລກມີຄວາມປາຖະໜາທີ່ຢາກເຂົ້າໃຈປະເທດຈີນນັບມື້ນັບແຮງກ້າ. ບົດລາຍງານຂອງກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ສະເໜີວ່າ: ຄວນເພີ່ມທະວີການແລກປ່ຽນດ້ານວັດທະນະທຳລະຫວ່າງຈີນກັບຕ່າງປະເທດ, ຖືຈີນເປັນຫຼັກ ເຊື່ອມໂຍງເຂົ້າກັນ. ຄວນເລົ່າເລື່ອງກ່ຽວກັບຈີນໃຫ້ດີ, ສະແດງໃຫ້ເຫັນປະເທດຈີນທີ່ແທ້ຈິງແລະຮອບດ້ານ, ຍົກກຳລັງແຫ່ງຊາດດ້ານວັດທະນະທຳຂອງຈີນໃຫ້ສູງຂຶ້ນ. ກ່ຽວກັບບັນຫາທີ່ເຮັດແນວໃດເພື່ອດຳເນີນການແລກປ່ຽນລະຫວ່າງວັດທະນະທຳທີ່ຕ່າງກັນ, ທ່ານເຊ້ຍຢົງໝີນກ່າວວ່າ: ພວກເຮົາໄປຄົ້ນຫາສິ່ງລ້ຳຄ່າທີ່ສຸດໃນວັດທະນະທຳຕ່າງໆ, ຜ່ານການແນະນຳສິ່ງລ້ຳຄ່າເຫຼົ່ານີ້, ຈະສາມາດຊ່ວຍປະຊາຊົນບັນດາປະເທດເຂົ້າໃຈຄ່ານິຍົມຂອງຊົນຊາດໃດໜຶ່ງຫຼືປະເທດໃດໜຶ່ງຢ່າງດີກວ່າເກົ່າ ແລະເຂົ້າໃຈສາເຫດທີ່ຕ້ອງເປັນໄປທີ່ເຮັດໃຫ້ເຂົາເຈົ້າເລືອກເສັ້ນທາງພັດທະນາແລະລະບອບສັງຄົມຂອງຕົນ.
 |
