ຕາມຂ່າວCRI： ວັນທີ 18 ຕຸລານີ້, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນໄດ້ໄຂຂຶ້ນຢູ່ນະຄອນຫຼວງປັກກິ່ງຂອງຈີນ. ເຊິ່ງໄດ້ຮັບຄວາມສົນໃຈໃນລະດັບສູງຈາກສື່ມວນຊົນສຳຄັນຕ່າງໆຂອງປະເທດອາຊີຕາເວັນອອກສຽງໃຕ້.
ວັນທີ 19 ຕຸລານີ້, ໜັງສືພິມ"ຫຼຽນເຫີຈາວປ້າວ"ຂອງສິງກະໂປໄດ້ພິມຂ່າວກ່ຽວກັບການໄຂກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນຢູ່ບ່ອນສຳຄັນຂອງໜ້າທຳອິດ, ແລະໄດ້ບັນລະຍາຍຢ່າງລະອຽດຕໍ່ບົດລາຍງານຂອງທ່ານສີຈິ້ນຜິງໃນນາມຜູ້ຕາງໜ້າຄະນະກຳມະການສູນກາງພັກກອມມູນິດຈີນຊຸດທີ 18. ໃນວັນທີ 20 ຕຸລານີ້, ໜັງສືພິມ "ຫຼຽນເຫີຈາວປ້າວ" ໄດ້ພິມບົດວິເຄາະກ່ຽວກັບບົດລາຍງານຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນວ່າ, ໃນ 15 ປີຕໍ່ໜ້ານີ້, ອະລິຍະທຳທາງວັດຖຸ, ອະລິຍະທຳທາງການເມືອງ, ອະລິຍະທຳທາງຈິດໃຈ, ອະລິຍະທຳທາງສັງຄົມ, ຊີວະພາບຂອງຈີນຈະໄດ້ຮັບການຍົກສູງຂຶ້ນຢ່າງຮອບດ້ານ, ລະບົບຄຸ້ມຄອງແລະຄວາມສາມາດດ້ານການບໍລິຫານແຫ່ງຊາດຈະບັນລຸລະດັບທັນສະໄໝ, ຈີນຈະກາຍເປັນປະເທດນຳໜ້າທາງດ້ານກຳລັງແຫ່ງຊາດສັງລວມແລະອິດທິພົນສາກົນ.
ໜັງສືພິມ "ຊີນຈູເດລີ" ຂອງມາເລເຊຍພິມບົດວິເຄາະຊີ້ອອກວ່າ, ບົດລາຍງານຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນໄດ້ວາງແຜນຜັງພັກກອມມູນິດຈີນທີ່ນຳພາປະເທດຈີນສ້າງຕົນໃຫ້ເປັນປະເທດສັງຄົມນິຍົມທີ່ເຂັ້ມແຂງ, ທັນສະໄໝຮັ່ງມີ, ປະຊາທິປະໄຕ, ສີວິໄລ, ກົມກຽວກັນແລະສວຍງາມໃນກາງສັດຕະວັດທີ 21, ເພື່ອບັນລຸຄວາມໄຝ່ຝັນຂອງຈີນທີ່ຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນ, ການຕິດຕໍ່ພົວພັນແລະການໄປມາຫາສູ່ກັນລະຫວ່າງຈີນກັບໂລກ.
ໂທລະພາບ VOICE TV ເຊິ່ງເປັນສື່ມວນຊົນສຳຄັນຂອງໄທໄດ້ລາຍງານທາງໂທລະພາບໂດຍມີຫົວຂໍ້ວ່າ "ທ່ານສີຈິ້ນຜິງກ່າວວ່າຈີນໄດ້ກ້າວເຂົ້າສູ່ຍຸກສະໄໝໃໝ່ ເນັ້ນໜັກການໄຂປະຕູຕໍ່ປະຊາຄົມໂລກ" ໂດຍຊີ້ອອກວ່າ, ຈີນທີ່ນຳພາໂດຍພັກກອມມູນິດຈີນຍຶດໝັ້ນການໄຂປະຕູຕໍ່ພາຍນອກແລະຮ່ວມມື, ນີ້ເປັນທ່າທີຂອງປະເທດໃຫຍ່ທີ່ປະຊາຄົມໂລກຢາກເຫັນ.
 |
