(ວັນທີ 20 ຕຸລານີ້ ທ່ານນາງວັນດີ ບຸດທະສະວົງ ເອກອັກຄະລັດຖະທູດ ສປປ ລາວປະຈຳ ສປ ຈີນຢ້ຽມຢາມ CRI, ທ່ານຫູປາງເຊິ້ງ ຮອງອຳນວຍການ CRI ໄດ້ຮັບຕ້ອນທ່ານທູດຢ່າງອົບອຸ່ນ)
ຕາມຂ່າວ CRI: ວັນທີ 20 ຕຸລານີ້ ທ່ານນາງວັນດີ ບຸດທະສະວົງ ເອກອັກຄະລັດຖະທູດ ສປປ ລາວປະຈຳ ສປ ຈີນ ໄດ້ຢ້ຽມຢາມວິທະຍຸສາກົນແຫ່ງປະເທດຈີນ (CRI) ຢູ່ທີ່ນະຄອນຫຼວງປັກກິ່ງ ເພື່ອໃຫ້ສຳພາດກ່ຽວກັບກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນທີ່ກຳລັງດຳເນີນຢູ່. ທ່ານາງວັນນດີໄດ້ຕີລາຄາສູງຕໍ່ຜົນງານທີ່ຈີນໄດ້ຮັບໃນ 5 ປີ ນັບແຕ່ໄຂກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນມາ ກໍ່ຄືບົດລາຍງານທີ່ກ່າວໂດຍສະຫາຍສີຈິ້ນຜິງໃນໂອກາດໄຂກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ, ທ່ານນາງເຫັນວ່າ ສະຫາຍສີຈິ້ນຜິງແມ່ນມີຄວາມເຫັນພິເສດດ້ານການປົກຄອງແລະພັດທະນາປະເທດ ເຊິ່ງໄດ້ສະແດງໃຫ້ເຫັນເຖິງຄວາມສະຫຼາດສ່ອງໃສຂອງທ່ານ. ຕໍ່ໄປ ເຊີນຟັງບົດແຈ້ງຂ່າວທີ່ກ່ຽວຂ້ອງ.
ໃນການສຳພາດ, ທ່ານທູດວັນດີ ໄດ້ເລົ່າເລື່ອງກ່ຽວກັບສະຫາຍສີຈິ້ນຜິງໃນສາຍຕາຂອງທ່ານ ໂດຍເຫັນວ່າແນວຄິດການປົກຄອງປະເທດຂອງສະຫາຍສີຈິ້ນຜິງໄດ້ສ້າງຄວາມປະທັບໃຈຢ່າງເລິກເຊິ່ງໃຫ້ແກ່ທ່ານ. ທ່ານທູດວັນດີກ່າວວ່າ:
"ຂ້າພະເຈົ້າກໍ່ເຄີຍໄດ້ອ່ານຂ່າວ ແລະໄດ້ພົບກັບສະຫາຍສີຈິ້ນຜິງຫຼາຍຄັ້ງ ໃນໂອກາດຕິດຕາມຄະນະຜູ້ແທນຂັ້ນສູງຂອງພັກ-ລັດລາວມາຢ້ຽມຢາມ ສປ ຈີນໃນຜ່ານມາ, ສະຫາຍສີຈິ້ນຜິງເປັນຜູ້ນຳທີ່ປ່ຽນລົ້ນໄປດ້ວຍປະສົບການ ແລະຜົນງານອັນໂດດເດັ່ນ ໃນການຊີ້ນຳ-ນຳພາ ພັກ-ລັດ ແລະປະຊາຊົນຈີນໃນພາລະກິດສ້າງສາພັດທະນາປະເທດຈີນ ຕະຫຼອດໄລຍະທີ່ຜ່ານມາ, ສະຫາຍມີຄວາມສະຫຼາດສ່ອງໃສ ໜັກແໜ້ນ ແລະສະໜິດສະໜົມໃກ້ຊິດຕິດແທດກັບປະຊາຊົນ, ເປັນຄົນເຮັດແທ້ທຳຈິງ ແລະມີຄວາມຕັດສິນໃຈຢ່າງເດັດດ່ຽວໃນການແກ້ໄຂບັນຫາສໍ້ລາດບັງຫຼວງ, ບັນຫາຄວາມທຸກຍາກ ແລະອື່ນໆ."
ທ່ານທູດວັນດີກ່າວວ່າ, ພາຍໃຕ້ການຊີ້ນຳນຳພາການພັດທະນາຂອງສະຫາຍສີຈິ້ນຜິງ, ຈີນໄດ້ຮັບຜົນງານທີ່ບໍ່ເຄີຍມີມາກ່ອນ. ທ່ານທູດວັນດີໄດ້ສະຫຼຸບວ່າຈີນໄດ້ເຂົ້າສູ່ສະໄໝໃໝ່ດ້ວຍຄຳວ່າ "ໃໝ່" ຫຼາຍອັນ, ທ່ານກ່າວວ່າ:
"ຕະຫຼອດໄລຍະ 5 ປີຜ່ານມາ ພາຍໃຕ້ການນຳພາຂອງພັກກອມມູນິດຈີນ ອັນມີສະຫາຍເລຂາທິການໃຫຍ່ ສີຈິ້ນຜິງເປັນແກນນຳນັ້ນ ສປຈີນ ສາມາດຍາດໄດ້ຜົນສຳເລັດໃນຫຼາຍດ້ານ ໃນພາລະກິດສ້າງສາປະເທດຈີນດ້ວຍທັດສະນະໃໝ່, ແນວຄິດໃໝ່ ແລະຍຸດທະສາດໃໝ່ ເພື່ອປົກຄອງລັດ-ບໍລິຫານປະເທດໃຫ້ມີຄວາມເຂັ້ມແຂງຮອບດ້ານ, ອັນໄດ້ເຮັດໃຫ້ພາລະກິດຍົກສູງຄັນທຸງສັງຄົມນິຍົມຕາມສີສັນຂອງຈີນນັ້ນ ປະສົບຜົນສຳເລັດຢ່າງໃຫຍ່ຫຼວງ ຮອບດ້ານ, ລະບົບການເມືອງສືບຕໍ່ມີສະຖຽນລະພາບຢ່າງໜັກແໜ້ນ, ວຽກງານປ້ອງກັນຊາດມີຄວາມເຂັ້ມແຂງ, ການພັດທະນາເສດຖະກິດ-ສັງຄົມຂະຫຍາຍຕົວຢ່າງໝັ້ນທ່ຽງ, ສະເລ່ຍ GDP ບັນລຸໄດ້ 7,2% ໃນແຕ່ລະປີ, ຊີວິດການເປັນຢູ່ຂອງປະຊາຊົນຈີນສືບຕໍ່ໄດ້ຮັບການປັບປຸງດີຂຶ້ນເປັນກ້າວໆ, ຍຸດທະສາດ "ໜຶ່ງແລວທາງ ໜຶ່ງເສັ້ນທາງ"ໄດ້ຮັບການສະໜັບສະໜຸນຢ່າງກວ້າງຂວາງຈາກປະເທດຕ່າງໆໃນໂລກ ແລະພວມມີກົນໄກຮ່ວມມືໃນພາກພື້ນຢ່າງເປັນຮູບປະທຳ, ໃນນັ້ນ ລວມທັງການຮ່ວມມືຕົວຈິງລະຫວ່າງ ສປປ ລາວ ແລະ ສປ ຈີນ."
ທ່ານທູດວັນດີແຕ່ລະມື້ກໍ່ຈະເປີດເບິ່ງເວັບໄຊພາສາລາວຂອງ CRI ທ່ານບອກໃຫ້ນັກຂ່າວຮູ້ວ່າ ຫວ່າງແລ້ວນີ້ ທ່ານໄດ້ອ່ານຂ່າວໜຶ່ງຈາກແວັບໄຊພາສາລາວຂອງ CRI ວ່າ ໃນ 5 ປີທີ່ຜ່ານມາ, ຢູ່ປະເທດຈີນສະເລ່ຍແລ້ວແຕ່ລະ 3 ວິນາທີໃດກໍ່ມີຄົນໜຶ່ງຫຼຸດພົ້ນອອກຈາກຄວາມທຸກຍາກ, ທ່ານເຫັນວ່າ ໃນບົດລາຍງານຂອງສະຫາຍສີຈິ້ນຜິງທີ່ກ່າວໃນກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນໄດ້ຢ້ຳວ່າ, ຕ້ອງຮັບປະກັນໃຫ້ປະຊາຊົນຜູ້ທຸກຍາກໃນປັດຈຸບັນຫຼຸດພົ້ນອອກຈາກຄວາມທຸກຍາກໃນປີ 2020, ນີ້ຖືເປັນຂ່າວທີ່ໜ້າຊື່ນຊົມ. ທ່ານທູດເຫັນວ່າ, ມາດຕະການບຳບັດຄວາມທຸກຍາກຂອງຈີນນັ້ນກໍ່ສາມາດກາຍເປັນບົດຮຽນທີ່ດີສຳລັບປະເທດລາວ.ທ່ານກ່າວວ່າ:
"ຂ້າພະເຈົ້າມີຄວາມສົນໃຈວ່າ ພັກ-ລັດຈີນຍັງໄດ້ເອົາໃຈໃສ່ເປັນພິເສດຕໍ່ວຽກງານແກ້ໄຂຄວາມທຸກຍາກຂອງປະຊາຊົນ ໂດຍໄດ້ມີແຜນອັນລະອຽດແລະຮອບຄອບ, ອັນນີ້ຖືເປັນຜົນງານອັນພົ້ນເດັ່ນ ໜ້າຊື່ນຊົມແລະເປັນກຳລັງໃຈອັນແຮງກ້າໃຫ້ແກ່ ສປປ ລາວ ພວກຂ້າພະເຈົ້າທີ່ກຳລັງສູ້ຊົນ ເພື່ອບັນລຸເປົ້າໝາຍເຮັດໃຫ້ ສປປ ລາວຫຼຸດພົ້ນອອກຈາກຄວາມເປັນປະເທດດ້ອຍພັດທະນາໃນປີ 2020."
ທ່ານທູດວັນດີຍັງມີຄວາມສົນໃຈເປັນພິເສດຕໍ່ພາກສ່ວນກ່ຽວກັບການຕ່າງປະເທດຂອງຈີນໃນບົດລາຍງານຂອງສະຫາຍສີຈິ້ນຜິງ. ທ່ານເຫັນວ່າ, ໃນ 5 ປີທີ່ຜ່ານມາ, ແນວຄິດການປົກຄອງປະເທດ ບໍລິຫານລັດຂອງສະຫາຍສີຈິ້ນຜິງກໍ່ສະແດງໃຫ້ເຫັນໃນຜົນງານດ້ານການຕ່າງປະເທດ. ທ່ານກ່າວວ່າ:
"ຕະຫຼອດໄລຍະ 5 ປີມານີ້ ສະເພາະດ້ານການຕ່າງປະເທດ, ສປ ຈີນໄດ້ປະສົບຜົນສຳເລັດຮອບດ້ານ, ອັນໄດ້ເປັນການສ້າງເງື່ອນໄຂອັນດີໃຫ້ແກ່ການພັດທະນາເດສຖະກິດພາຍໃນປະເທດ ເຊິ່ງການລິເລີ່ມນະໂຍບາຍ "ໜຶ່ງແລວທາງ ໜຶ່ງເສັນທາງ", ສ້າງຕັ້ງທະນາຄານລົງທຶນພື້ນຖານໂຄງລ່າງອາຊີ, ສ້າງກອງທຶນເສັ້ນທາງສາຍໄໝ, ຈັດກອງປະຊຸມສົນທະນາລະດັບສູງໜຶ່ງແລວທາງ ໜຶ່ງເສັ້ນທາງ ຄັ້ງປະຖົມມະເລີກ, ເປັນເຈົ້າພາບຈັດກອງປະຊຸມສຸດສາກົນຕ່າງໆລ້ວນແຕ່ໄດ້ເປັນການສະແດງໃຫ້ເຫັນເຖິງບົດບາດ ແລະອິດທິພົນຂອງພັກ-ລັດຈີນໃນເວທີພາກພື້ນແລະສາກົນ, ທັງເຮັດໃຫ້ສາກົນເຫັນໄດ້ຄວາມພະຍາຍາມຂອງ ສປ ຈີນໃນການປະກອບສ່ວນຊຸກຍູ້ແລະສົ່ງເສີມສັນຕິພາບໂລກ."
ໃນບົດລາຍຂອງສະຫາຍສີຈິ້ນຜິງ, ມີປະໂຫຍກໜຶ່ງເຮັດໃຫ້ທ່ານທູດວັນດີເກີດມີຄວາມຮູ້ສຶກຢ່າງເລິກເຊິ່ງ, ນັ້ນກໍ່ຄື ສະຫາຍສີຈິ້ນຜິງໄດ້ກ່າວວ່າ, "ພັກກອມມູນິດຈີນບໍ່ພຽງແຕ່ແມ່ນພັກການເມືອງທີ່ສະແຫວງຫາຄວາມສຸກໃຫ້ແກ່ປະຊາຊົນຈີນທໍ່ນັ້ນ ຍັງແມ່ນພັກການເມືອງທີ່ບາກບັ່ນສູ້ຊົນເພື່ອພາລະກິດຄວາມກ້າວໜ້າຂອງທົ່ວມວນມະນຸດ", ທ່ານທູດວັນດີໄດ້ຕີລາຄາຢ່າງສູງຕໍ່ຄຳເວົ້າດັ່ງກ່າວ:
"ຕະຫຼອດໄລຍະ 90 ກວ່າປີຜ່ານມາ, ພັກກອມມູນິດຈີນ ໄດ້ນໍາພາປະຊາຊົນຈີນ ດໍາເນີນການຕໍ່ ສູ້ກູ້ຊາດ ແລະ ຍາດໄດ້ໄຊຊະນະເປັນກ້າວໆມາ, ນຳພາປະຊາຊົນຈີນ ກ້າວສູ່ຄວາມມັ່ງຄັ່ງເຂັ້ມແຂງ, ເອົາການພັດທະນາ ແລະ ຜົນປະໂຫຍດຂອງປະຊາຊົນ ເປັນບູລິມະສິດ, ກາຍເປັນປະເທດ ທີ່ມີບົດບາດສໍາຄັນ ໃນການຂັບເຄື່ອນເສດຖະກິດ ລກ ແລະ ແກ້ໄຂບັນຫາສໍາຄັນຕ່າງໆຂອງໂລກ.
ພັກກອມມູນິດຈີນ ເປັນພັກການເມືອງທີ່ຮັກຫອມສັນຕິພາບ, ສະແຫວງຫາການ ພັດທະນາ ແລະ ການຮ່ວມມືຕ່າງຝ່າຍຕ່າງໄດ້ຮັບຜົນປະໂຫຍດ, ປະຕິບັດນະໂຍບາຍການຕ່າງປະເທດ ສັນຕິພາບ, ເອກະລາດ, ເປັນເຈົ້າຕົນເອງ ໂດຍໄດ້ຕັ້ງໜ້າ ເສີມຂະຫຍາຍການພົວພັນຮ່ວມມື ກັບປະເທດຕ່າງໆໃນທົ່ວໂລກ, ອັນໄດ້ ເຮັດໃຫ້ສາກົນເຫັນໄດ້ ຄວາມພະຍາຍາມຂອງຈີນ ໃນການປະກອບສ່ວນສົ່ງເສີມສັນຕິພາບ ໂລກ ກໍ່ຄື ພາລະກິດຄວາມກ້າວໜ້າຂອງມວນມະນຸດໃນໂລກ. ການສ້າງສາພັດທະນາປະເທດຊາດ ໂດຍ ພາຍໃຕ້ການນໍາພາຂອງພັກກອມມູນິດ ທີ່ເປັນພັກກໍາອໍານາດນັ້ນໄດ້ເປັນບົດຮຽນອັນດີ ໃຫ້ແກ່ບັນດາປະເທດ ຕ່າງໆໃນໂລກ, ໃນນັ້ນ ກໍ່ມີ ສປປ ລາວ ພວກຂ້າພະເຈົ້າ."
