ທ່ານຫວາງເຟິ່ຍເສ ສາສະດາຈານຈາກວິທະຍາໄລວິສະວະກຳແລະວິທະຍາສາດເອເລັກໂຕຣນິກ ທີ່ຂຶ້ນກັບມະຫາວິທະຍາໄລວິທະຍາສາດ-ເຕັກໂນໂລຊີປ້ອງກັນປະເທດ ທີ່ເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນ ໄດ້ກ່າວຢູ່ນະຄອນຫຼວງປັກກິ່ງໃນວັນທີ 22 ຕຸລານີ້ວ່າ: ລະບົບນຳທາງດາວທຽມ "ເປີຍໂຕ໋ວ" ໄດ້ຖືກນຳໃຊ້ໃນຂະແໜງການຕ່າງໆຢ່າງກວ້າງຂວາງ ລວມທັງການນຳໃຊ້ໃນມືຖືທົ່ວໄປ.
ລະບົບ "ເປີຍໂຕ໋ວ" ແມ່ນໂຄງການທີ່ຈີນໄດ້ເລີ່ມວາງແຜນພັດທະນາໃນຊຸມປີ 1990. ຂະນະທີ່ທ່ານຫວາງເຟິ່ຍເສ ກໍໄດ້ເຂົ້າຮ່ວມວຽກງານຄົ້ນຄວ້າລະບົບ "ເປີຍໂຕ໋ວ" 1, 2 ແລະ ປັດຈຸບັນກຳລັງກໍ່ສ້າງລະບົບ "ເປີຍໂຕ໋ວ" 3. ໃນການສຳພາດຂ່າວຮ່ວມທີ່ສູນຖະແຫຼງຂ່າວກອງປະຊຸມພັກຄັ້ງທີ 19 ໃນວັນທີ 22 ຕຸລານີ້, ທ່ານຫວາງເຟິ່ຍເສ ກໍໄດ້ຢືນຢັນວ່າ ຕົນເປັນສັກຂີພິຍານໃຫ້ຂະບວນການພັດທະນາລະບົບ "ເປີຍໂຕ໋ວ" ຈາກບໍ່ມີມາສູ່ມີ ແລະ ເຂດສັນຍານປົກຄຸມພາຍໃນປະເທດ ແລະເຂດອ້ອມຂ້າງປະເທດ ໄດ້ຂະຫຍາຍກວ້າງອອກເຖິງພາກພື້ນອາຊີປາຊີຟິກ ລວມທັງທົ່ວໂລກຕື່ມອີກ.
ທ່ານຫວາງເຟິ່ຍເສ ກ່າວຕື່ມວ່າ: ນອກຈາກການຂັບລົດເດີນທາງແລ້ວ, ຮູບແບບການດຳລົງຊີວິດແບບເຄື່ອນທີ່ ທີ່ພັດທະນາໃໝ່ໃນຊຸມປີມໍ່ໆມານີ້ ເປັນຕົ້ນ ການຊື້ເຄື່ອງທາງອິນເຕີເນັດ, ການຈັດສົ່ງສິນຄ້າດ່ວນ, ການບໍລິການສົ່ງອາຫານເຖິງທີ່, ການເຊົ່າລົດທາງອິນເຕີເນັດ ແລະ ລົດຖີບແບ່ງປັນ ທີ່ຫາກໍພັດທະນາໃໝ່ໃນປີນີ້ ບໍ່ສາມາດຕັດແຍກຈາກການບໍລິການສະໜອງຈຸດທີ່ຕັ້ງ ແລະ ໂມງເວລາ ທີ່ແນ່ນອນຈາກລະບົບ "ເປີຍໂຕ໋ວ" ນັ້ນໄດ້ເດັດຂາດ. ປັດຈຸບັນ, ລະບົບ "ເປີຍໂຕ໋ວ" ໄດ້ຖືກນຳໃຊ້ໃນຂະແໜງການຕ່າງໆຢ່າງກວ້າງຂວາງແລ້ວ ແລະກໍຖືກນຳໃຊ້ໃນມືຖືຢ່າງແຜ່ຫຼາຍ. ຂະນະທີ່ຂ້າພະເຈົ້າໃນຖານະເປັນໜຶ່ງໃນຄະນະຄົ້ນຄວ້າລະບົບ "ເປີຍໂຕ໋ວ" ກໍສຸດແສນພາກພູມໃຈທີ່ສຸດ.
