ໃນເດືອນສິງຫາປີນີ້, Ipsos ເຊິ່ງເປັນອົງການໃຫ້ຄຳປຶກສາຕະຫຼາດຂອງຝຣັ່ງໄດ້ສຳຫຼວດຄຳເຫັນຂອງປະຊາຊົນ 26 ປະເທດເຊັ່ນ: ຈີນ, ອາເມລິກາ, ອັງກິດ, ຍີ່ປຸ່ນແລະອື່ນໆ, ເຊິ່ງຜົນການສຳຫຼວດດັ່ງກ່າວສະແດງໃຫ້ເຫັນວ່າ, ປະຊາຊົນຈີນ 87% ເຫັນໄປໃນແງ່ດີຕໍ່ການພັດທະນາຂອງປະເທດຕົນໃນອະນາຄົດ, ເຊິ່ງເປັນອັນດັບທີໜຶ່ງໃນ 26 ປະເທດທີ່ມີການສຳຫຼວດ.
ທ່ານລູເຈຍນິນ, ຫົວໜ້າສະຖາບັນຄົ້ນຄວ້າຕາເວັນອອກໄກຂອງສະພາບັນດິດວິທະຍາສາດຣັດເຊຍເຫັນວ່າ, ຈີນປະສົບຜົນສຳເລັດໃນຫຼາຍຂົງເຂດເຊັ່ນການພັດທະນາເສດຖະກິດປະດິດສ້າງໃໝ່, ການຮ່ວມມືສາກົນແລະອື່ນໆເຊິ່ງຜົນສຳເລັດດັ່ງກ່າວເປັນຜົນພວງມາຈາກການປະຕິບັດຮູບການພັດທະນາສັງຄົມນິຍົມທີ່ມີສີສັນພິເສດຂອງຈີນ, ການກຳນົດຍຸດທະສາດແລະແຜນການໃນກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໄດ້ສ້າງ "ໂຕແບບ" ສຳຄັນໃຫ້ແກ່ປະເທດອື່ນ.
ຮູບແບບທີ່ປະສົບຜົນສຳເລັດຂອງຈີນ ບໍ່ພຽງແຕ່ໄດ້ເຮັດໃຫ້ປະເທດຈີນເອງມີການພັດທະນາຢ່າງວ່ອງໄວແລະຮອບດ້ານເທົ່ານັ້ນ, ແຕ່ຍັງໄດ້ເປັນໂຕແບບສຳລັບປະຊາຊົນແລະລັດຖະບານປະເທດອື່ນເພື່ອຖອດຖອນບົດຮຽນຈາກຈີນໃນການບັນລຸການພັດທະນາເສດຖະກິດໃຫ້ເປັນທັນສະໄໝອີກດ້ວຍ".
ນອກນີ້, ໂຕແບບແລະບົດຮຽນຈາກຈີນ ຍັງສະແດງໃຫ້ເຫັນໃນຂົງເຂດຕ້ານການສໍ້ລາດບັງຫຼວງ ເຊິ່ງທ່ານຊີມອນ ຄາຢາ ໂມໂຢ ລັດຖະມົນຕີສື່ມວນຊົນ, ຖະແຫຼງຂ່າວ ແລະ ການບໍລິການການໂຄສະນາຂ່າວຊິມບາເວ ກໍມີຄວາມປະທັບໃຈຢ່າງເລິກເຊິ່ງຕໍ່ເລື່ອງນີ້ ໂດຍໄດ້ກ່າວວ່າ: "ພວກຂ້າພະເຈົ້າຂໍຍ້ອງຍໍຊົມເຊີຍຕໍ່ການເຄື່ອນໄຫວຕ້ານການສໍ້ລາດບັງຫຼວງຂອງພັກກອມມູນິດຈີນ. ຂະນະທີ່ຢູ່ຊິມບາເວ, ພວກຂ້າພະເຈົ້າກໍພວມຕໍ່ສູ້ກັບປາກົດການສໍ້ລາດບັງຫຼວງເຊັ່ນດຽວກັນ, ແຕ່ມັນບໍ່ແມ່ນເລື່ອງງ່າຍທີ່ຈະສຳເລັດ. ພວກຂ້າພະເຈົ້າຄວນຮ່ຳຮຽນເອົາບົດຮຽນຕ້ານການສໍ້ລາດບັງຫຼວງຂອງຈີນ ໂດຍສະເພາະເຈົ້າໜ້າທີ່ຮັບຜິດຊອບຕ້ານການສໍ້ລາດບັງຫຼວງຂອງພວກຂ້າພະເຈົ້າຄວນຈະຮຽນໄດ້ຫຼາຍບົດຮຽນຂອງຈີນ".
ໃນກອງປະຊຸມໃຫຍ່ຂອງພັກຄັ້ງທີ 19, ພັກກອມມູນິດຈີນຍັງໄດ້ກ່າວຢ້ຳທັດສະນະການຄຸ້ມຄອງທົ່ວໂລກໂດຍຜ່ານການຫາລືຮ່ວມກັນ, ກໍ່ສ້າງຮ່ວມກັນ ແລະ ຊົມໃຊ້ຮ່ວມກັນ ວາງນະໂຍບາຍຕໍ່ພາຍນອກທີ່ເນັ້ນການດຳເນີນການກໍ່ສ້າງໂດຍການເປີດປະຕູປະເທດ, ຕັ້ງໜ້າພັດທະນາການພົວພັນຄູ່ຮ່ວມມືໃນໂລກ ແລະ ສ້າງປະຊາຄົມຮ່ວມຊະຕາກຳມວນມະນຸດ. ທ່ານໂລຣີ ເປຍຊີ ຜູ້ຊ່ວຍອະທິການບໍດີມະຫາວິທະຍາໄລວາສໃຕ້ໃໝ່ຂອງອົສຕຣາລີ ຊີ້ໃຫ້ເຫັນວ່າ: ພະລັງແຮງຈາກຈີນຈະຊຸກດັນປະເທດຕ່າງໆເຂົ້າຮ່ວມຂະບວນການພັດທະນາໂລກາພິວັດ.
"ພວກຂ້າພະເຈົ້າໄດ້ເຫັນທ່ານ ສີຈິ້ນຜິງ ກ່າວໃນບົດລາຍງານວ່າ: ຈີນຈະຕັ້ງໜ້າສືບຕໍ່ເຂົ້າຮ່ວມການຄຸ້ມຄອງທົ່ວໂລກ, ປັດຈຸບັນຂໍພຽງແຕ່ຜູ້ນຳຈີນກ່າວເຖິງເສດຖະກິດຈີນແລະທິດທາງການພັດທະນາການເມືອງຂອງຈີນ, ຄົນທົ່ວໂລກກໍຈະຮັບຟັງ. ຈີນພວມເພີ່ມທະວີສິດໃນການອອກຄວາມເຫັນຕໍ່ວຽກງານສາກົນຂອງຕົນ ເພື່ອເສີມຂະຫຍາຍບົດບາດສຳຄັນໃນການຄຸ້ມຄອງທົ່ວໂລກ."
ທ່ານນາງ ເລຍເດຍ ຊາມາບັກຣ໌ສ໌ ເຈົ້າໜ້າທີ່ຜູ້ຊີ້ນຳການພົວພັນສາກົນຂອງພັກກອມມູນິດຝະຣັ່ງເຫັນວ່າ: ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໄດ້ສະແດງໃຫ້ເຫັນເຖິງຄວາມຕັດສິນໃຈຂອງຈີນທີ່ກ້າແບກຫາບໜ້າທີ່ຄວາມຮັບຜິດຊອບພາຍໃນຂອບເຂດທົ່ວໂລກອີກເທື່ອໜຶ່ງ.
ທ່ານ ດຣ.ດີປັກ ຜູ້ຊ່ຽວຊານກ່ຽວກັບບັນຫາຈີນຂອງມະຫາວິທະຍາໄລຈາວາຮາລາ ນິຮ໌ຣູ ປະເທດອິນເດຍກ່າວວ່າ: ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ບໍ່ພຽງແຕ່ໄດ້ວາງແຜນພັດທະນາຂອງຈີນໃນອະນາຄົດເທົ່ານັ້ນ,ຂະນະດຽວກັນກໍໄດ້ວາງແຜນການທີ່ລະອຽດໃຫ້ແກ່ການບັນລຸເປົ້າໝາຍເຫຼົ່ານີ້ອີກດ້ວຍ. ຈີນບັນລຸຄວາມຈະເລີນຮຸ່ງເຮືອງແລະຮັ່ງມີເຂັ້ມແຂງຕື່ມອີກ ກໍຈະນຳເອົາຜົນປະໂຫຍດໃຫ້ແກ່ບັນດາປະເທດຢູ່ໃນໂລກ.
