ອາຊຽນເປີດໂທລະສັບສາຍດ່ວນດ້ານປ້ອງກັນປະເທດ

ວັນທີ 24 ຕຸລານີ້, ອາຊຽນປະກາດຢູ່ຟິລິປິນວ່າຈະເປີດໂທລະສັບສາຍດ່ວນດ້ານປ້ອງກັນຊາດຢ່າງເປັນທາງການ ເພື່ອແກ້ໄຂກໍລະນີກະທັນຫັນທີ່ອາດຈະເກີດຂຶ້ນໃນຂົງເຂດປ້ອງກັນປະເທດດ້ວຍການສື່ສານໂດຍກົງຢ່າງວ່ອງໄວ.
ໃນກອງປະຊຸມລັດຖະມົນຕີກະຊວງປ້ອງກັນປະເທດອາຊຽນຄັ້ງທີ 11 ແລະກອງປະຊຸມເປີດກວ້າງລັດຖະມົນຕີກະຊວງປ້ອງກັນປະເທດອາຊຽນຄັ້ງທີ 4 ໂດຍການເປັນປະທານຂອງທ່ານແດວຟິນ ໂລເຣນຊານາ ລັດຖະມົນຕີກະຊວງປ້ອງກັນປະເທດຟິລິປິນ ທີ່ເປັນປະເທດປະທານໝູນວຽນອາຊຽນນັ້ນ, ທ່ານໄດ້ປະກາດວ່າການເປີດໂທລະສັບສາຍດ່ວນດ້ານປ້ອງກັນປະເທດຊື່ວ່າ "ກົນໄກສື່ສານຕິດຕໍ່ພົວພັນໂດຍກົງອາຊຽນ" ຢ່າງເປັນທາງການຄັ້ງນີ້ ມີລັດຖະມົນຕີກະຊວງປ້ອງກັນປະເທດຂອງບັນດາປະເທດອາຊຽນເຂົ້າຮ່ວມ ແລະເປັນສັກຂີພິຍານ.
ປະເທດບຣູໄນ ທີ່ເປັນປະເທດປະທານໝູນວຽນໃນປີ 2013 ຮຽກຮ້ອງໃຫ້ ສ້າງກົນໄກໂທລະສັບສາຍດ່ວນດ້ານປ້ອງກັນປະເທດອາຊຽນເປັນເທື່ອທຳອິດ ໂດຍເຊື່ອວ່າກົນໄກນີ້ສາມາດກາຍເປັນເຄື່ອງມືທີ່ສຳຄັນໃນການຊ່ວຍເຫຼືອ ແລະປ້ອງກັນເຫດການບັງເອີນທີ່ເກີດຂຶ້ນຢູ່ທະເລ.