ກອງປະຊຸມເປີດກວ້າງຂອງລັດຖະມົນຕີປ້ອງກັນປະເທດອາຊຽນຄັ້ງທີ 4 ໄດ້ໄຂຂຶ້ນຢູ່ເມືອງຄລາກປະເທດຟິລິບປິນໃນຕອນເຊົ້າວັນທີ 24 ຕຸລານີ້ ໂດຍມີທ່ານ ຊາງວ້ານຊວນ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງປ້ອງກັນປະເທດ ຈີນ ພ້ອມດ້ວຍຜູ້ນຳກະຊວງປ້ອງກັນປະເທດຂອງ 10 ປະເທດອາຊຽນ ແລະ 7 ປະເທດຄູ່ເຈລະຈາຂອງອາຊຽນເຂົ້າຮ່ວມ.
ໂອກາດດັ່ງກ່າວ, ທ່ານ ຊາງວ້ານຊວນ ກ່າວວ່າ, ຜົນສຳເລັດຂອງການດຳເນີນກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ເປັນຂີດໝາຍສະແດງໃຫ້ເຫັນວ່າ ພາລະກິດອັນຍິ່ງໃຫຍ່ແຫ່ງສັງຄົມນິຍົມທີ່ມີສີສັນພິເສດຂອງຈີນ ໄດ້ກ້າວເຂົ້າສູ່ຍຸກໃໝ່. ຈີນຈະເດັດດ່ຽວຈັດຕັ້ງປະຕິບັດຕາມແນວຄິດໃໝ່, ທັດສະນະໃໝ່ ແລະ ຂໍ້ລິເລີ່ມໃໝ່ດ້ານການຕ່າງປະເທດລະບົບໜຶ່ງທີ່ສະເໜີໂດຍທ່ານປະທານ ສີຈິ້ນຜິງ, ເດີນຕາມເສັ້ນທາງການພັດທະນາໂດຍສັນຕິຢ່າງເດັດດ່ຽວໜຽວແໜ້ນ ແລະ ສຸມໃສ່ສ້າງປະຊາຄົມຮ່ວມຊາຕາກຳຂອງມວນມະນຸດ. ຂະນະດຽວກັນ, ກອງທັບຈີນ ຈະສືບຕໍ່ລົງເລິກເສີມຂະຫຍາຍການແລກປ່ຽນດ້ວຍໄມຕີຈິດມິດຕະພາບ ແລະ ການຮ່ວມມືທີ່ແທດເໝາະກັບຕົວຈິງ ກັບກອງທັບບັນດາປະເທດໃນໂລກ ເຊິ່ງລວມທັງປະເທດອາຊີປາຊິຟິກ, ຮ່ວມກັນປົກປັກຮັກສາສັນຕິພາບ ແລະ ສະຖຽນລະພາບຂອງພາກພື້ນ ກໍຄືຂອງໂລກ ແລະ ບັນລຸຄວາມວັດທະນາຖາວອນພ້ອມກັນ.
ກອງປະຊຸມດັ່ງກ່າວ ໄດ້ໄຂຂຶ້ນພາຍໃຕ້ການເປັນປະທານຂອງທ່ານ ແດວຟິນ ໂລເຣັນຈານາ ລັດຖະມົນຕີກະຊວງປ້ອງກັນປະເທດຟິລິບປິນ ທີ່ເປັນປະເທດປະທານໝູນວຽນອາຊຽນ, ຂະນະທີ່ຜູ້ນຳກະຊວງປ້ອງກັນປະເທດຂອງປະເທດຕ່າງໆ ໄດ້ປະກອບຄຳເຫັນກ່ຽວກັບສະຖານະການຄວາມໝັ້ນຄົງຂອງພາກພື້ນ ກໍຄືບັນຫາທີ່ສົນໃຈຮ່ວມກັນ.